सिन्धुली । फिक्कल गाउँपालिका प्रथम लगानी सम्मेलन यहि मंसिर १३ र १४ गते हुने भएको छ । फिक्कल गाउँपालिकाको खाङसाङमा लगानी सम्मेलन गरिने भएको गाउँपालिकाले पत्रकार सम्मेलनको आयोजना गरि जानकारी दिएको छ ।
फिक्कल गाउँपालिकाको दीर्घकालिन विकासको जग बसाउन प्रस्थान विन्दु बनाउने गरि सम्मेलनको आयोजना गरिएको फिक्कल गाउँपालिकाले जनाएको छ । गाउँपालिकाले सोमबार सिन्धुलीमाढीमा पत्रकार सम्मेलन गर्दै सम्भावित उत्पादन मुलक क्षेत्रमा लगानी बढाउने र रोजगारी सृजना गर्ने उद्देश्यले लगानी सम्मेलन गर्न लागिएको जनाएको हो ।
‘हाम्रो सपना, उद्देश्य, लक्ष्य, गन्तव्य एउटै छ, ‘समृद्ध फिक्कल, सुखी फिक्कलबासी’ भन्ने नारा सहित आन्तरिक तथा बाह्य लगानी भित्राउने र लगानीकर्तालाई आकर्षित गर्ने उद्देश्यका साथ लगानी सम्मेलनको आयोजना गरिएको गाउँपालिकाका अध्यक्ष पार्वती सुनुवारले बताएकी छिन ।
पत्रकार सम्मेलन मार्फत लगानी सम्मेलनको बारेमा जानकारी दिदैं सुनुवारले ५० अर्व लगानी गाउँपालिकामा भित्राउने र फिक्कलबासीलाई स्वरोजगार बनाउने लक्ष्य सहित लगानी सम्मेलनको आयोजना गरिएको बताईन ।
उनले गाउँपालिका र विज्ञसहित गरिएको अध्ययन अनुसार फिक्कलमा लगानी भित्राउने क्षेत्रहरु दर्जन भन्दा बढी पहिचान गरिएको र संमृद्धिको सम्भावना अत्यधिक रहेको पाईएकाले लगानी भित्राउन सम्मेलनको आयोजना गरिएको बताईन । गाउँपालिकाको लगानीले मात्र फिक्कलको समृद्धिलाई पूर्णता दिन नसक्ने देखिएपछि लगानी सम्मेलनको आयोजना गरिएको उनले बताईन ।
सुनुवारले कृषि, उद्यमशिलता, शिक्षा, स्वास्थ्य, पर्यटन, साहसिक पर्यटन, औधोगिक क्षेत्र, हस्पिटालिटी लगाएतका दर्जन बढी क्षेत्रमा लगानी गर्न सकिने पहिचान गरिएको उनले पत्रकार सम्मेलनमा जानकारी दिएकी छिन ।
जिल्ला भित्र र बाहिरका लगानीकर्तालाई आकर्षण गर्न र छलफल आगाडी बढाउन सम्मेलन फलदायी हुने गाउँपालिकाको विश्वास रहेको छ ।
गाउँपालिकाले लगानी सम्मेलनबाट कृषि उत्पादन वृद्धि, ग्रेनिङ, प्रोसेसिङ, प्याकेजिङमा आकर्षित गर्ने, स्थानीय स्रोत साधनको र सिपको अधिकतम् उपयोगको लागि खोजी गर्ने, गाउँपालिकालाई उद्यमशील क्षेत्रमा रुपान्तरित गर्ने सम्भावनामाथि छलफल गर्ने, सहकारी, उद्योग, बाणिज्य लगायत आर्थिक क्षेत्रमा विकासको सम्भावना पहिचान गर्ने, गाउँपालिकालाई सांस्कृतिक, पर्यटकीय र सम्पदा क्षेत्रमा रुपान्तरित गर्ने लगायतका उद्देश्यहरु समावेश गरि सम्मेलनको आयोजना गरेको जनाएको छ ।
फिक्कलमा मध्यपहाडी लोकमार्गसँगको कनेक्सन, प्रसिद्ध धार्किक स्थलहरु, प्राकृतिक स्रोत तथा जैविक विविधता अनुसार विभिन्न फलफुल खेति, जल विहारको लागि सुनकोशी नदीको उपलब्धता, २४ सय मिटर अग्लो चुचुरो फिक्कल लगायतका सम्भाव्यता स्थलहरुको बिषयमा बिज्ञहरुसँग परामर्श, खोज तथा अध्ययन भइसकेको अध्यक्ष सुनुवारको भनाई छ ।
लगानी सम्मेलन आयोजना गर्नु पुर्व नै विज्ञ मार्फत लगानी सम्भावित क्षेत्रहरुको पहिचान, बजेट र सोबाट आउने प्रतिफल जस्ता बिषयमा खोज, अध्ययन तथा परामर्श भइसकेको पनि उनले जानकारी दिएकी छिन ।
त्यस मध्येबाट पनि प्राथमिकताका आधारमा पर्यटन प्रवद्र्धन, जडिबुटि प्रबद्र्धन, फफुल खेती, कृषी विकास, पशुपालन लगायत एक दर्जन भन्दा बढी परियोजना निर्दिष्ट गरिएको छ पनि उनले बताएकी छिन ।
फिक्कल गाउँपालिकाले नीतिगत निर्णयहरु गर्ने, लगानीको वातावरण बनाउने र लगानीकर्तालाई ढुक्क भएर लगानी गर्ने वातावरण बनाउने पनि गाउँपालिकाले जनाएको छ ।
स्थानीय तहबाट हुन लागेको यो जिल्लाको पहिलो लगानी सम्मेलन पनि हो । फिक्कल गाउँपालिका प्रथम लगानी सम्मेलन खाङसाङवेशीमा मंसिर १३ गते नेपाल सरकारका अर्थमन्त्री प्रकाश शरण महतले उद्घाटन गर्ने भएको गाउँपालिका उपाध्यक्ष राजु बरालले बताए ।
