सिन्धुली । जिल्ला प्रहरी कार्यालय सिन्धुलीले मंगलबार ६८ औं प्रहरी दिवस मनाएको छ । जिल्ला प्रहरी कार्यालयमा औपचारिक कार्यक्रमको आयोजना गरि प्रहरी दिवस मनाएको हो ।
प्रहरी दिवसका अवसरमा अमर प्रहरी परिवारलाई सम्मान तथा सलामी अर्पण गरेर दिवस मनाईएको हो । प्रमुख जिल्ला अधिकारी सुनिता नेपालले अमर प्रहरी स्तम्भमा सलामी तथा माला अर्पण गरिन ।
साथै जिल्लाका स्थानीय तहका प्रमुख उपप्रमुखहरु, सरकारी निकायका प्रमुखहरु, सुरक्षा निकायका प्रमुख एवम् सुरक्षाकर्मीहरु, पूर्व प्रहरी परिवार, नागरिक समाज लगाएतले प्रहरी स्तम्भमा माल्यार्पण गरेका थिए ।
कार्यक्रममा असोज महिनाको उत्कृष्ट प्रहरीका रुपमा महिला, बालबालिका तथा जेष्ठ नागरिक सेवा केन्द्रका प्रहरी हवल्दार उमा घलानलाई पुरस्कृत गरिएको छ ।
प्रहरी दिवसका अवसरमा ९ जना पूर्व प्रहरी परिवारलाई सम्मान गरिएको छ । द्वन्द्वका क्रममा मारिएका पूर्व प्रहरीका परिवारहरुलाई सम्मान गरिएको हो । सम्मानित हुनेमा निरजकुमार केसी, सन्तमाया डोल्मा, अमृत कार्की, देवी बहादुर पर्वछाने, पूर्ण बहादुर खड्का, पदम बहादुर थापा, नरमाया श्रेष्ठ, रामप्रसाद चौलागाई लगाएतलाई सम्मान गरिएको छ ।
यस्तै यस आर्थिक वर्षमा प्रहरीलाई विशेष सहयोग गर्ने विभिन्न व्यक्ति, संस्था तथा निकायहरुलाई सम्मान गरिएको छ । यसरी सम्मानित हुनेमा कमलामाई नगरपालिका, तिनपाटन गाउँपालिका, सिद्धवावा टेलिभिजन, निर्माण व्यवसायी हिमाल अधिकारी, विश्वज्योति थापा, बुद्धि श्रेष्ठ, जनसेवा पुस्तकालयका अध्यक्ष शेषराज दाहाल, कमलामाई पार्टी प्यालेस सिन्धुली, गोलञ्जोर ५ का कृष्णकुमार हायु, प्रेम बहादुर श्रेष्ठ, लालबहादुर थापा, खिलनाथ सापकोटा, निर्मलकुमार रम्तेल लगाएत सम्मानित भएका छन ।
यस्तै दिवसका अवसरमा जिल्ला प्रहरी कार्यालय सिन्धुलीले आयोजना गरेको आन्तरिक खेलकुद प्रतियोगितामा विजेता हुनेहरुलाई समेत पुरस्कृत गरिएको छ ।
पुरस्कृत हुनेमा व्याडमिन्टनतर्फ प्रहरी उपरिक्षक राजकुमार सिलवाल र प्रहरी हवल्दार सुवास लोप्चन पुरस्कृत भएका छन । टेवलटेनिसमा रमेश लामा र मनोज कुमार दास पुरस्कृत भएका छन । म्युजिकल चियरमा प्रहरी जवान खगिश्वरा नेपाली पुरस्कृत भएकी छिन । यस्तै प्रहरी दिवसको अवसरमा भलिवल प्रतियोगितामा प्रथम हुने रेशम घर्ति मगर, मोतिलाल तामाङ, चन्द्र बहादुर वि.क, रविन गुरुङ, झविलाल राहु मगर, गणेश तामाङ, पविन राईको समूह सम्मानित भएको छ । यस्तै नेपाली सेना, नेपाल प्रहरी र सशस्त्र प्रहरीबीच भएको ५ किलोमिटर दौडमा प्रथम हुने भवानी वक्स गणका सिपाहि पूर्ण बहादुर कटुवाललाई सम्मान गरिएको छ ।
यस्तै प्रहरी दिवसको अवसरमा विभिन्न विद्यालयहरुका विद्यार्थीहरुबीच भएको समुदायमा नेपाल प्रहरीको भूमिका विषयक निवन्ध प्रतियोगितमा प्रथम हुने सूर्योदय माविका अविना अधिकारी, द्वितिय हुने सिद्धस्थली माविका कुशल थापा, तृतिय हुने सिद्धस्थली माविका सुदिक्षा चौधरीलाई पुरस्कृत गरिएको छ ।
प्रहरी दिवसका अवसरमा बोल्दै प्रमुख जिल्ला अधिकारी सुनिता नेपालले शान्ती सुरक्षामा नागरिक तथा सरोकारवाला सबै जिम्मेवार हुनुपर्ने बताईन । उनले पछिल्लो समय सामाजिक सञ्जालका कारण धार्मिक तथा सामाजिक द्वन्द्व बढीरहेकाले सामाजिक सञ्जालको प्रयोग गर्दा ध्यान दिन समेत आग्रह गरेकी छिन ।
प्रमुख जिल्ला अधिकारी सुनिता नेपालको प्रमुख आतिथ्यतामा भएको कार्यक्रममा प्रहरी नायव उपरिक्षक चिरञ्जीवि दाहालले स्वागत गरेका थिए भने प्रहरी उपरिक्षक राजकुमार सिलवालले धन्यवाद ज्ञापन गरेका थिए । कार्यक्रममा पूर्व प्रहरी राम बहादुर हायु, कमलामाई नगरपालिकाका मेयर उपेन्द्र कुमार पोखरेलले मन्तव्य व्यक्त गरेका थिए ।
