सिन्धुली । सिन्धुलीमाढीमा सञ्चालित लालीगुराँस उपभोक्ता सहकारी संस्थाले केहि नयाँ योजनाहरु अगाडि सारेको छ । लालीगुराँस ब्रान्डलाई व्यवसायीक बनाउन र सहकारीलाई समय अनुकुल चलाउनका लागि सहकारीले केहि नयाँ योजना अगाडि सारेको हो ।
सहकारी संस्थाको आईतबार सिन्धुलीमाढीमा सम्पन्न १५ औं साधारणसभामा उक्त योजना ल्याईएको छ र साधारणसभाले ती योजना अनुमोदन समेत गरेको छ ।
पहिलो योजना लालीगुराँसलाई विभिन्न व्यवसायमा ब्राण्डका रुपमा अगाडि ल्याउने, ब्राण्ड स्थापित गर्न व्यवसायीलाई प्रोत्साहन र सम्मान गर्ने कार्यक्रम संस्थाले अगाडि सारेको छ । यो योजनामा सहकारीले संस्थाको उत्पादनसँग जोडिएर ठेला व्यवसाय गर्नेलाई १३ प्रतिशत व्याजदरमा एक लाख ऋण समेत दिने योजना ल्याएको छ । सहकारीले यो योजनामा बार्षिक २ जनालाई सहभागि बनाउन सक्ने छ ।
यस्तै सहकारीले अर्को योजना सहकारीलाई मोवाईल एप्समा जोड्ने र सहकारीका कामलाई प्रविधिमैत्री बनाउने रहेको छ । जसमा संस्थाको वेवसाईड, फेसबुक पेज र आर्थिक कारोबारका लागि सफ्टवेयर लगाएतको प्रयोगलाई प्राथमिकतामा राखेको छ । संस्थाले अब विद्युतिय कारोबारलाई पूर्ण रुपले लागु गर्ने भएको छ ।
यस्तै सहकारीले असल वचतकर्ता, असल ऋणि, असल उद्यमी सदस्य तथा सहकारी अभियन्ताहरुलाई पुरस्कार तथा सम्मानका कामलाई निरन्तरता दिएको छ । जसलाई कानुनी बैधानिकता दिदैं अगाडि बढेको छ ।
सहकारीले यो साधारणसभामा नयाँ अर्को योजना समेत अघि सारेको छ । त्यो हो जीवन सारथी बचत । सहकारीले चालु आर्थिक वर्षमा ५० जोडीको जीवन सारथी बिमा गर्ने र कम्तिमा १३ प्रतिशत व्याज दिने निर्णय गरेको छ । जसका लागि एकलाख रुपैंया जम्मा गर्नुपर्ने छ । सहकारी संस्थाका अध्यक्ष नवराज कोइरालाको अध्यक्षता एवम् सहकारीका जेष्ठ सदस्य राम बहादुर हायुको प्रमुख आतिथ्यतामा भएको कार्यक्रममा १५ वटा मैनवत्ति १५ अतिथिले प्रज्वलन गरि साधारणसभाको उद्घाटन गरिएको थियो ।
साधारणसभामा अध्यक्षले प्रमुख अतिथिलाई स्वागत गर्ने र मञ्चमा आमन्त्रित अतिथिहरुले क्रमशः स्वागत गरि अतिथि सत्कारको नयाँ प्रयोग समेत गरिएको थियो । सहकारी संस्थाको साधारणसभामा असल बचतकर्ता विर बहादुर माझी, असल ऋणी बिमला काफ्ले, लालीगुराँस व्यवसायी सम्मानबाट लालीगुराँस व्राण्डका व्यवायीहरु दिपक लिम्बु (लालीगुराँस कलर ल्याब), सिताराम पहाडी (लाली गुराँस ड्रिङकिङ वाटर), गणेश राउत (लालीगुराँस अफसेट प्रेस) लाई सम्मान गरिएको छ ।
यस्तै साधारणसभापूर्व कनपा ५ मा लालीगुराँस फ्रेमिङ उद्योगको समेत उद्घाटन गरिएको छ । सहकारी संस्थाका सदस्य सोनी कुमारी गुभाजुले उक्त उद्योग सञ्चालनमा ल्याएकी हुन ।
