सिन्धुली । समाजसेवी निलिमा गुरुङले संकटमा रहेका महिला तथा बालबालिकालाई विभिन्न सामग्री सहयोग गरेकी छिन । उनले सिन्धुलीका विभिन्न ठाउँमा पुगेर सहयोग गरेकी हुन । सिन्धुलीको तिनकन्याकी गुरुङले आफ्नै लगानीमा खाद्यान्न, लत्ताकपडाका साथै विभिन्न सामग्री हस्तान्तरण गरेकी हुन । उनले महिला सुरक्षा हाउसमा बसेका ३ जना आश्रित बालबालिकालाई लत्ताकपडा र महिलाहरुलाई पाँच बोरा चामल सहयोग गरेकी छिन ।
त्यस्तै कमलामाई नगरपालिकाले सञ्चालन गरेको आवासिय विद्यालय कमला जनज्योति माविका २० जना अनाथ बालबालिकालाई खाद्यान्न तथा ट्रयाकसुट सहयोग गरेकी छिन । उनले २० जना बालबालिकालाई २० जोर ट्रयाकसुट र १० बोरा चामल हस्तान्तरण गरेकी हुन ।
यस्तै गुरुङले कमलाखोंच बाल आश्रमलाई १० बोरा चामल, ४३ इन्चको टेलिभिजन र ९ जना बालबालिकालाई ट्रयाकसुट उपलब्ध गराएकी छिन । उनले दुधौली १० मा रहेको उक्त बालआश्रमको संरक्षक रहने समेत घोषणा गरेकी छिन ।
यस्तै दुधौली १० मा रहेको वृद्धाश्रममा समेत उनले सहयोग गरेकी छिन । आश्रममा रहेका तीनजना वृद्धाहरुलाई सारी र ५ बोरा चामल सहयोग गरेकी हुन । यसैबीच उनले गरीव तथा असहाय २ जना महिलाहरुलाई समेत सहयोग गरेकी छिन । कमलामाई नगरपालिका १३ की सुमित्रा श्रेष्ठ र कनपा ४ हिरापानी बस्ने सृजना नेपालीलाई २, २ बोरा चामल सहयोग गरेकी छिन ।
यसैबीच उनले कारागारमा रहेका बालबालिकालाई समेत लत्ता कपडा उपलब्ध गराएकी छिन । उनले कारागारमा रहेका १२ जना आश्रित बालबालिकालाई सहयोग गरेकी हुन ।
अखिल नेपाल महिला संघका नेताहरुको समन्वयमा गुरुङले सहयोग उपलब्ध गराएकी हुन । गुरुङ हाल काठमान्डौमा बस्दै आएकी छिन ।
