सिन्धुली । गैह्रसरकारी संस्था महासंघ सिन्धुली र जिल्लामा क्रियाशिल गैससले सुरक्षित आवास गृह (सेफ हाउस) लाई विहिबार आवश्यक सामग्री हस्तान्तरण गरेको छ ।
११३ औं अन्तराष्ट्रिय श्रमिक महिला दिवसको अवसरमा सेफ हाउसमा रहेका महिलाहरुलाई आवश्यक पर्ने सामग्री हस्तान्तरण गरिएको हो ।
गैसस महासंघका अध्यक्ष खेटराज अधिकारीको अध्यक्षतामा भएको हस्तान्तरण कार्यक्रममा जिल्ला समन्वय समिति सिन्धुलीका उपप्रमुख शान्ता कार्की र प्रमुख जिल्ला अधिकारी सुनिता नेपालले सेफ हाउसका गिता देवकोटालाई संयुक्त रुपमा सामग्री हस्तान्तरण गरेका हुन ।
गैससहरुले सेफ हाउसमा महिलाहरुलाई सिप सिक्न आवश्यक पर्ने इन्टरलक मेसिन, २ कार्टुन लुगाधुने सावुन, बालबालिकाका लागि आवश्यक पर्ने हर्लिक्स लगाएतका सामग्री हस्तान्तरण गरेका हुन ।
जिल्ला समन्वय समिति सिन्धुलीका उपप्रमुख शान्ता कार्कीले सुरक्षित आवास गृहलाई दीर्घकालिन सञ्चालन गर्नका लागि सबै सरोकारवालाको सहयोग आवश्यक रहेको बताईन ।
कार्यक्रममा प्रमुख जिल्ला अधिकारी सुनिता नेपालले गैससहरुले हिंसापीडित महिलाहरुको सिप अभिवृद्धिमा सहयोग गर्न आग्रह गरिन ।
गैसस महासंघ सिन्धुलीका अध्यक्ष खेटराज अधिकारीले गैससहरु हिंसापीडितहरुलाई सहयोग गर्न तयार रहेको बताए ।
सहकार्य नेपाल सिन्धुली, सामुहिक सरोकार समाज, जनजाती समाज विकास कार्यक्रम र गैसस महासंघले संयुक्त रुपमा सामग्री सहयोग गरेका हुन ।
