सिन्धुली । क्रियाशिल पत्रकार महिला (डब्लुडब्लुजे) सिन्धुलीको अध्यक्षमा राधिका बुढाथोकी सर्वसम्मत निर्वाचित भएकी छिन । बुधबार सिन्धुलीमाढीमा सम्पन्न सातौं जिल्ला अधिवेशनबाट उनी सर्वसम्मत अध्यक्षमा निर्वाचित भएकी हुन ।
डब्लुडब्लुजेको उपाध्यक्षमा उर्मिला भट्टराई, सचिवमा सुनिता वि.क, सहसचिवमा प्रतिक्षा कार्की, कोषाध्यक्षमा मेनुका आरण निर्वाचित भएका छन । यस्तै सदस्यहरुमा सर्मिला खड्का, गंगा विशंखे, गुना मगर, विनु वि.क, बिमला मगर र गोमा श्रेष्ठ निर्वाचित भएका छन ।
डब्लुडब्लुजे सिन्धुलीका अध्यक्ष कृञ्जला पुलामीको अध्यक्षता एवम् डब्लुडब्लुजे सिन्धुलीका संस्थापक अध्यक्ष एवम् न्युनतम पारिश्रमिक निर्धारण समितिका सदस्य बिमला पाण्डेको प्रमुख आतिथ्यतामा अधिवेशन भएको थियो ।
अधिवेशनलाई सम्बोधन गर्दै प्रमुख अतिथि बिमला पाण्डेले सञ्चारमाध्यमहरुले लैंगिक नीति बनाउनुपर्नेमा जोड दिईन । उनले महिला पत्रकारहरुले समयमा तलब नपाउने, नियुक्ति नपाउने, क्षमता अनुसारको काम नपाउने, नेतृत्वमा विभेद लगाएतका समस्या रहेकाले त्यसतर्फ बहस गर्न आवश्यक रहेको बताईन ।
महिला पत्रकारहरुको समस्याहरुको पहिचान गरेर नेपाल पत्रकार महासंघ, सञ्चारमाध्यमहरु, सञ्चारसँग सम्बन्धित संस्थाहरुसँग गहन छलफल गर्न र खबरदारी गर्न आवश्यक रहेको बताईन । उनले डब्लुडब्लुजे महिला पत्रकारहरुको हकहितमा काम गर्ने र पैरवी गर्ने संस्था भएको र नेतृत्व विकास गर्ने संस्था समेत रहेको नविर्सन पत्रकार महिलाहरुलाई आग्रह गरिन ।
कार्यक्रममा डब्लुडब्लुजे सिन्धुलीका पूर्व अध्यक्ष रमा कार्कीले महिला पत्रकारहरुले एकताबद्ध आवाज उठान गर्न आवश्यक रहेको बताईन । उनले व्यवसायीक क्षमतासँगै नेतृत्वको विकास गर्न महिला पत्रकारहरुलाई आग्रह गरिन ।
यस्तै कार्यक्रमलाई सम्बोधन गर्दै डब्लुडब्लुजे सिन्धुलीका पूर्व अध्यक्ष चिना थापाले पत्रकार महिलाले व्यवसायीक क्षमता विकास गर्दै आर्थिक उपार्जनमा समेत जोडिन आग्रह गरिन । उनले राम्रो काम गर्न सक्ने पत्रकारको भविष्य राम्रो रहेको बताईन ।
