सिन्धुली । नेकपा एमालेका केन्द्रीय सदस्य सरेश नेपालले नेपालको राष्ट्रपति को बनाउने भन्ने विषयमा भारतका नागरिक र राजनीतिक नेतालाई किन चिन्ता ? भनि प्रश्न गरेका छन । उनले बुधबार सिन्धुलीमाढीमा आयोजित पत्रकार सम्मेलनमा बोल्दै राष्ट्रपति को बनाउने भन्ने नेपालको मामिला रहेको बताए ।
नेपालका राजनीतिक दल र नेपालको राजनीतिलाई सधै अस्थिर बनाउने खेलमा भारत लागेको पनि उनले बताएका छन । त्यसबाट नेकपा एमाले पनि अछुतो नरहन सक्छ उनले भनेका छन ।
पत्रकार सम्मेलनमा सम्बोधन गर्दै नेपालले पार्टीलाई जीवन्त, अनुशासित र सुदृढ बनाउन ग्रास रुट अभियान सञ्चालन गरिएको बताएका छन । नेकपा एमालेको ग्रास रुट अभियान सञ्चालनका लागि सिन्धुली आएका नेपालले पार्टीलाई अनुशासित, सक्षम र व्यवस्थित बनाउन यो अभियान सुरु गरिएको बताएका छन ।
उनले अभियानका क्रममा पार्टी कमिटीहरु गठन, पुनर्गठन, सदस्यता नविकरण गर्ने, प्रशिक्षित गर्ने लगाएतका काम अभियानका क्रममा गरिने समेत बताए ।
पार्टीमा संगठनात्मक अराजकता बढेको र पार्टी कार्यकर्तामा विचलन आउन थालेकाले यो अभियान गाउँ गाउँमा पुराउन थालिएको नेपालले बताए । पार्टीको आन्तरिक जीवनमा आएका उतारचढाव र बैचारिक विचलनलाई रोक्न अभियान सुरु गरिएको पनि उनले बताएका छन ।
जनताको भावना र विश्वास जित्न र पार्टीको सामथ्र्य विकास गर्न पनि अभियान सार्थक हुने नेपालले बताएका छन ।
अभियानका क्रममा जनताको मुद्दा उठान र निराकरण गरिने छ । स्थानीय सरकारहरुलाई व्यवस्थित गरि जनता प्रति उत्तरदायी बनाउने, संगठित सदस्यको संख्या अध्यावधिक गर्ने, पार्टीका कमिटीहरुलाई पुनःर्जागृत गर्ने काम गरिने छ ।
अभियानमा केन्द्रीय कमिटी, प्रदेश कमिटी, जिल्ला कमिटीका नेताहरु, पालिका कमिटीहरु, वडा कमिटीहरु, जनवर्गिय संगठनका नेताहरु, पार्टीका सल्लाहकारहरु सबै परिचालन गरिने छ । सिन्धुलीको अभियान बुधबार सिन्धुलीमाढीमा उद्घाटन गरिने छ । जिल्लाको अभियानको लागि सिन्धुलीमाढीमा हुने बैठकले कार्ययोजना बनाउने छ । पार्टीको नीति, नेतृत्व स्थापित गर्न अभियान सफल हुने नेता नेपालले बताएका छन । उनले पत्रकारहरुलाई अभियानमा सक्रिय र सद्भावयुक्त सहयोगी भूमिका खेलिदिन समेत आग्रह गरेका छन ।
