सिन्धुली । राष्ट्रिय भूमिअधिकार मञ्च नेपालका महासचिव बलबहादुर ले राष्ट्रिय भूमि आयोग र स्थानीय सरकारले जग्गाको वर्गिकरण गर्दा भूमिहिन सुकुम्बासीले ध्यान दिनु पर्ने बताए । आवास क्षेत्र बनाउँदा किसाले थोरै जमिन पाउने र कृषि क्षेत्रमा बढी जमिन पाउने भएकाले जमिनको वर्गिकरण गर्दा ध्यान दिन आग्रह गरेका हुन ।
भूमिहिन, सकुम्बासीलाई लालपूर्जा दिन खोज्दा भूमाफियाहरुले षडयन्त्र गरिरहेकाले पनि भूमिहिन, सकुम्बासी र अव्यवस्थित बसोबासीहरु सचेत हुनुपर्ने बेला आएको तामाङले बताए ।
राष्ट्रिय भूमि अधिकार मञ्च सिन्धुलीको चौथो जिल्ला सम्मेलनको मंगलबार भिमानमा उद्घाटन गर्दै उनले यस्तो बताएका हुन । उनले सामन्ती सुकुम्बासीले लालपूर्जा वितरण हुने भएपछि विभिन्न बखेडा झिक्न थालेकाले भूमिअधिकार आन्दोलनलाई अझ सशक्त र प्रभावकारी बनाउनुपर्नेमा जोड दिए ।
कार्यक्रममा बोल्दै कमलामाई नगरपालिकाका उपप्रमुख मञ्जु देवकोटाले ऐलानी सकुम्बासी, अव्यवस्थित बसोबासीको समस्या समाधान गर्न स्थानीय तहले काम गरिरहेको र गर्ने बताईन । उनले नागरिकलाई राज्यले सुकुम्बासी नबनाउने नीति सरकारको रहेकाले त्यसको कार्यान्वयन गर्न तीनै तहका सरकार जिम्मेवार बन्नुपर्ने बताईन ।
कार्यक्रममा बोल्दै न्युनतम पारिश्रमिक निर्धारण समितिका सदस्य बिमला पाण्डेले भूमिहिन, सुकुम्बासी आन्दोलन मानवअधिकारको आन्दोलन भएको बताईन । उनले भूमिहिन आन्दोलनले उठाएका गाउँव्लक नापी र दर्ता, भूमिमा महिला अधिकारका लागि संयुक्त लालपूर्जा, भूमिहिन, सुकुम्बासी, सामाजिक विभेदमा परेका समुदायलाई सुरक्षित आवास र खानपुग्ने जग्गा, भोगका आधारमा ऐलानी जग्गा दर्ता, प्राकृतिक प्रकोप वा अन्य कारणले विस्थापितहरुको पुनस्र्थापना जस्ता विषयहरु राज्यले सम्बोधन गरेको बताईन । भूमि अधिकार आन्दोलनका अगुवाले भूमि अधिकारका सवालमा राज्यलाई झकझकाउँदै अधिकार स्थापित गर्न राज्यसँग समन्वयात्मक भूमिका खेल्नुपर्ने पनि उनले बताईन ।
कार्यक्रममा बोल्दै भूमि अधिकार मञ्चका केन्द्रीय सदस्य फौदासिंह स्याङ्वाले अन्यायपूर्ण जग्गा वर्गिकरण रोकिनुपर्नेमा जोड दिए । कार्यक्रममा बोल्दै मञ्चका बाग्मति प्रदेश अध्यक्ष रमेश देवकोटाले दर्ता नभएका मोहि, गुठीका समस्या जिल्लामा जस्ताको तस्तै रहेको बताए । उनले स्थानीय तहले लालपूर्जा वितरणलाई पहिलो प्राथमिकतामा राख्न समेत जोड दिए ।
मञ्चका जिल्ला अध्यक्ष टिका बहादुर देवकोटाको अध्यक्षतामा भएको कार्यक्रममा भूमिअधिकार आन्दोलनको प्रतिनिधित्व गर्दै प्रतिनिधिसभा सदस्यमा निर्वाचित सरस्वति सुब्बा, निर्मला देवकोटा, मञ्चका संस्थापक अध्यक्ष जितलाल अधिकारी दनुवार र जग्गादाता खिलहरी गिरीलाई सम्मान गरिएको छ । कार्यक्रममा कमलामाई नगरपालिकाका प्रमुख प्रशासकीय अधिकृत सूर्य दाहाल, प्रकृति मानव जनअभियानका केन्द्रीय सदस्य मिथिला फुयाँल लगाएतले मन्तव्य व्यक्त गरेका थिए भने संस्थाको प्रगति प्रतिवेदन अध्यक्ष टिका बहादुर देवकोटाले प्रस्तुत गरेका थिए ।
सम्मेलनले टिका बहादुर देवकोटाको अध्यक्षतामा १५ सदस्यीय नयाँ कार्यसमिति सर्वसम्मत निर्वाचित गरेको छ । जसको उपाध्यक्षमा डोर कुमारी कार्की (बोगटी), सचिवमा किसुनलाल कुमर, सहसचिवमा अनिता पहाडी, कोषाध्यक्षमा शान्ता राउत निर्वाचित भएका छन ।
यस्तै सदस्यमा मनु तामाङ, गोविन्द बहादुर वि.क, पूर्ण बहादुर थापा, वेन्व बहादुर लाखे, कृष्णमाया दाहाल, नर बहादुर श्रेष्ठ चयन भएका छन । यस्तै ४ जना सदस्य पछि चयन गरिने भएको छ ।
सम्मेलनले धर्मलाल कुमरको संयोजकत्वमा सात सदस्यीय सल्लाहकार कमिटी समेत चयन गरेको छ । जसको सदस्यमा राम बहादुर श्रेष्ठ, मिथिला फुयाँल, सुरेश देवकोटा, घनश्याम थापा, इच्छा राउत, अप्सरा खड्का चयन भएका छन ।
