सिन्धुली । अन्तर्राष्ट्रिय मानवअधिकार दिवसका अवसरमा कमलामाई नगरपालिका सिन्धुलीले कारागारमा रहेका महिला कैदीबन्दीहरुलाई न्यानो कपडा वितरण गरेको छ ।
शनिबार नगरपालिकाले ८३ जना महिला कैदी बन्दी र उनीहरुसँग आश्रित १२ जना बालबालिकाहरुलाई न्यानो कपडा वितरण गरेको हो ।
कमलामाई नगरपालिकाका प्रमुख उपेन्द्र कुमार पोखरेल, उपप्रमुख मञ्जु देवकोटाले कारागारमा पुगेर न्यानो कपडा वितरण गरेका हुन ।
नगरपालिकाले महिलाहरुलाई प्रति व्यक्ति एक सेट पोलरसेट र १ वटा फर ज्याकेट उपलब्ध गराएको छ भने बालबालिकाको लागि हुक सेट उपलब्ध गराएको छ ।
न्यानो कपडा वितरण गर्दै नगरप्रमुख पोखरेलले काराकारको जीवनलाई तितो अनुभव मानेर बाँकी जीवन समाजमा सुशासन र कानुनी राज्य स्थापनामा खर्च गर्न आग्रह गरेका छन । उनले नेपाललाई कारागारमुक्त देशका रुपमा स्थापित गराउन भेदभाव, हिंसामुक्त समाज बनाउनुपर्ने आवश्यकता रहेको बताए । उनले लैंगिक हिंसा विरुद्धको अभियान सञ्चालन गर्नु नपर्ने वातावरण बनाउन सबै सरोकारवाला लाग्नुपर्ने आवश्यकता रहेको बताएका छन ।
कार्यक्रममा बोल्दै नगर उपप्रमुख मञ्जु देवकोटाले न्युनतम मानवअधिकारको प्रत्याभूति गर्नका लागि तीनै तहका सरकार क्रियाशिल हुनुपर्नेमा जोड दिईन । उनले लैंगिक हिंसा न्युनिकरण गर्न तीनै तहका सरकारले नीति नियम बनाउने र कार्यान्वयन गर्नेतर्फ ध्यान दिनुपर्ने बताईन ।
