सिन्धुली । नेपाल रेडक्रस सोसाइटी सिन्धुली जिल्ला शाखाले सिन्धुली अस्पताललाई प्रसुति सेवा तथा विरामी भएका नवजात शिशु व्यवस्थापनका लागि आवश्यक सामग्री हस्तान्तरण गरेको छ । सोमबार भेन्टिलेटर सहित सिप्याप मेसिन, बिलिरुविन मिटर, सिरिन्ज पम्प फ्लो लगायत १६ प्रकारका सामग्री हस्तान्तरण गरेको हो ।
कमलामाई नगरपालिका सिन्धुलीका नगर प्रमुख खड्ग बहादुर खत्री, प्रमुख जिल्ला अधिकारी सुरेश न्यौपाने, नेपाल पत्रकार महासंघ सिन्धुलीका अध्यक्ष कृष्णहरि घिमिरे लगाएतको उपस्थितिमा अस्पताल व्यवस्थापनलाई सामग्री हस्तान्तरण गरिएको रेडक्रस सिन्धुलीका सभापति अशोक श्रेष्ठले बताए । उनका अनुसार अस्पताल व्यवस्थापन समितिका अध्यक्ष प्रलाद पोखरेल र मेडिकल सुपरिटेन्डेन उमेश प्रधानलाई अस्पतालमै पुगेर सामग्री हस्तान्तरण गरिएको हो ।
कोरोना महामारीको समयमा प्रसुति सेवा तथा नवजात शिशु विरामी भएको अवस्थामा अत्यावश्यक उपचार सेवा वितरण गर्न कठिनाइ भइरहेको अवस्थामा रेडक्रस सिन्धुलीले उपलब्ध गराएको सामाग्रीहरुले गम्भीर प्रकृति बाहेकका नवजात बिरामी शिशुको उपचारका लागि धुलिखेलसम्म पुग्नुपर्ने बाध्यता हट्ने रेडक्रस सिन्धुली शाखाका सभापति श्रेष्ठले बताए ।
उक्त सामाग्रीहरु क्यानेडियन रेडक्रसको सहयोगमा नेपाल रेडक्रस सोसाइटी केन्द्रीय कार्यालयमार्फत सिन्धुली जिल्ला शाखालाई प्राप्त भएको पनि उनले बताएका छन ।
