सिन्धुली । सिन्धुलीको दुधौली नगरपालिकाले आइतबार राती १२ बजेदेखि लागु हुने गरि ११ २९ गते रातीसम्मका लागि लकडाउन घोषणा गरेको छ । नगरपालिकाका १४ वटै वडामा लागु हुने गरि लकडाउनको घोषणा गरिएको दुधौली नगरपालिकाले जनाएको छ ।
नगर विपद व्यवस्थापन समिति दुधौलीको आइतबार बसेको बैठकले अत्यावश्यक सेवा बाहेकका सबै सेवा बन्द हुने जनाएको छ । यस्तै धार्मिक, सामाजिक कार्यक्रमहरु २५ जना भन्दा कम मानिसको उपस्थितिमा स्वास्थ्यको मापदण्ड पालना गरि गर्न समेत नगरपालिकाले अनुरोध गरेको छ । यस्ता कार्यक्रम गर्दा बढीमा २ वटा सवारी साधनको मात्र प्रयोग गर्न दिईने समेत नगरपालिकाले जारी गरेको सूचनामा उल्लेख गरिएको छ ।
जिल्लाका कमलामाई नगरपालिका, दुधौली नगरपालिका र सुनकोशी गाउँपालिकामा कोभिड १९ संक्रमणका विरामी भेटिएपछि दुधौली नगरपालिकाले लकडाउन घोषणा गरेको हो ।
अत्यावश्यक सेवा खाद्यान्न, तरकारी फलफूल लगाएतका पसलहरुलाई विहान १० बजेदेखि दिउँसो २ बजेसम्म चल्न दिने, बैंकिङ सेवालाई पालैपालो सिस्टमबाट सञ्चालन गर्ने, भिडभाड हुने स्थानहरुबाट दिइने सेवा सबै बन्द गरिने समेत बैठकले निर्णय गरेको छ ।
बैठकले बजार, होटल, शैलुन, स्थानीय सार्वजनिक यातायातका साधनहरु, सरकारी कार्यालय, गैह्रसरकारी संघसंस्था लगाएतका सेवाहरु बन्द रहनेछन । सरकारी कार्यालयको हकमा आवश्यक परेका बेला कर्मचारीलाई मापदण्ड पालना गरि कार्यालयमा उपस्थित गराउन सकिने नगरप्रमुख घनश्याम राउतले जारी गरेको सूचनामा जनाईएको छ । दुधौली नगरपालिकामा २९ जना नयाँ संक्रमित भेटिएका छन ।
