सिन्धुली । जिल्लाको तिनपाटन गाउँपालिकाले स्वास्थ्य सुरक्षाका मापदण्ड अपनाएर पठनपाठन सुचारु गर्न निर्देशन दिएको छ । गाउँपालिका भित्रका आधारभूत तथा माध्यामिक विद्यालयहरुलाई असोज ११ गतेसम्म समन्वय, छलफल र आवश्यक तयारी गरि विद्यालयमा पठनपाठन सुचारु गर्न निर्देशन दिएको हो ।
गाउँ शिक्षा समितिको शनिबार बसेको बैठकको निर्णय बमोजिम विद्यालय खोल्न आइतबार सबै विद्यालयलाई निर्देशन दिईएको गाउँपालिकाका प्रमुख प्रशासकीय अधिकृत विष्णु प्रसाद सुवेदीले जानकारी दिएका छन ।
विद्यालयलाई दिईएको निर्देशनमा विद्यालय व्यवस्थापन समिति, गाउँ शिक्षा समिति, शिक्षा शाखा, अविभावकहरु, शिक्षक र विद्यार्थीसँग आवश्यक समन्वय तथा पूर्व तयारी गरि स्वास्थ्य मापदण्ड अनिवार्य रुपमा अवलम्बन हुने गरि विद्यालयहरु सञ्चालन गर्न, जिल्ला बाहिर रहेका शिक्षकलाई छठ पछि विद्यालयमा हाजिर हुने व्यवस्था मिलाउने, अत्यावश्यक स्वास्थ्य सुरक्षाका सामग्री गाउँपालिका तथा विद्यालयको समन्वयमा व्यवस्थापन गर्ने र ढिलोमा असोज ११ गतेसम्म पूर्व तयारी सक्ने उल्लेख गरिएको छ ।
दिइएको निर्देशनमा शिक्षा समितिको निर्णय कार्यान्वयन गराउन अनुरोध समेत गरिएको छ । कोभिडका कारण सुचारु हुन नसकेका विद्यालयहरुमा पठनपाठनको तयारी गरि बालबालिकाको शिक्षाको अधिकारलाई सुनिश्चित गर्न खोजिएको गाउँपालिकाले जनाएको छ ।
