सिन्धुली । कमलामाई नगरपालिका सिन्धुलीले लकडाउनका कारण समस्यामा परेका १ हजार ५८९ जनालाई राहत दिएको छ । नगरपालिकाको वडा नं. १ देखि १४ सम्मका अति गरिब, मजदुर तथा अप्ठेरोमा परेका विद्यार्थी लगाएतलाई राहत वितरण गरिएको नगरपालिकाले जनाएको छ । 
वडाबाट सिफारिस भएका १ हजार १३३ राहत ग्राह्य परिवार र अन्य क्षेत्रका गरि एक हजार ५८९ परिवारलाई राहत वितरण गरिएको कमलामाई नगरपालिकाका प्रमुख खड्ग खत्रीले बताएका छन । उनले १५ देखि २० दिनसम्मलाई पुग्ने खाद्यान्न लगाएतका राहत सामग्री उपलब्ध गरिएको बताए ।
राहत पाएका मध्ये नेपाल रेडक्रस सोसाईटी र प्लान नेपालले सरकारले तोकेको मापदण्ड अनुसारको खाद्यान्न आउने नगद राहत दिएको छ भने नगरपालिकाले खाद्यान्न नै उपलब्ध गराएको छ । नगरपालिकाका तथा वडाहरुको समन्वयका आधारमा रेडक्रसले नगरका ६ वटा वडाका ७६१ परिवारलाई राहत वितरण गरेको छ भने अन्य परिवारलाई कमलामाई नगरपालिकाले राहत दिएको हो । प्लानले वडा नं. ५, ७, ११, १२, १३ र १४ मा राहत वितरण गरेको थियो । रेडक्रसले प्रति परिवार २ हजार ७३० रुपैंया उपलब्ध गराएको हो ।
नगरपालिकाले लकडाउन सुरु भएपछि पहिलो चरणमा ६२ जना गिट्टी कुट्ने मजदुरलाई राहत वितरण गरेको थियो । नगरपालिकाले स्वास्थ्य विमाको प्रिमियम योगदान गरेको ३९४ घरपरिवारलाई दोस्रो चरणमा राहत वितरण गरेको थियो । नगरपालिकाले अति गरिब मजदुरको स्वास्थ्य विमा गरेको थियो ।
त्यसपछि वडाको सिफारिसमा आएका मजदुर, गरिबलाई राहत वितरण गरिएको नगरपालिकाल जनाएको छ । यस्तै लकडाउनका कारण समस्यामा परेका र खाद्य संकटमा परेका दैनिक ज्यालादारी गर्ने र नगरपालिका भित्र भाडामा बसेका १३ जना विद्यार्थीलाई समेत राहत उपलब्ध गराएको खत्रीले बताए ।
नगरपालिकाले बनाएको मापदण्डलाई आधार बनाएर राहत वितरण गरेको थियो । सामाजिक सुरक्षा भत्ता प्राप्त नगर्ने घर परिवार, आफ्नै खेती वा खेती कमाई नभएका घरपरिवार, जागिर, पेन्सन नभएका घर परिवार र बैदेशिक रोजगारमा नभएका घरपरिवारलाई नगरपालिकाले राहत वितरण गर्ने मापदण्ड तय गरेको थियो ।
उक्त मापदण्डका आधारमा १४ वटै वडाबाट सिफारिस भएका १ हजार १३३ राहत ग्राह्य घरपरिवारहरु छनौट भएका थिए ।
