सिन्धुली । शनिबार श्रीमानले पाकीरहेको माछाको तरकारीको झोलमा मुख डुवाई घाइते बनाइएकी दुधौली नगरपालिका वडा नं. ४ हटियाकी ३० वर्षिय आशा सदालाई इन्सेक सिन्धुलीले आर्थिक सहयोग गरेको छ । छिमेकी महिलाहरुसँग गफ गरेको भन्दै आशालाई उनका श्रीमान ३२ वर्षिय रितु सदाले पाकिरहेको तरकारीमा मुख डुवाई घाइते बनाई घरमै बन्धक बनाएर फरार भएका थिए ।
आर्थिक अवस्था कमजोर रहेकी उनलाई इन्सेक जिल्ला प्रतिनिधि बिमला पाण्डे सिन्धुली अस्पतालमा उपचाररत रहेकै अवस्थामा आइतबार साँझ अस्पतालमा पुगि सहयोग गरेकी हुन ।
उपचारका लागि काठमान्डौ लानका लागि थोरै रकम सहयोग गरिएको पाण्डेले बताईन । उनलाई सिन्धुली अस्पतालले सोमबार विहान रिफर गरेको छ । पीडितलाई त्रिवि शिक्षण अस्पताल महाराजगञ्ज काठमान्डौमा उपचार सुरु गरिएको छ । उनको उपचारमा विभिएस नेपालले सहयोग गर्ने भएको सिन्धुली ट्रष्टका अध्यक्ष उज्जलविक्रम थापाले बताए ।
यस्तै सिन्धुली अस्पतालमा उपचार तथा कुरुवाको खानवस्नको व्यवस्था सिन्धुली अस्पतालले गरेको छ भने काठमान्डौ लादाको एम्बुलेन्स खर्चको व्यवस्था एकद्धार संकट व्यवस्थापन केन्द्र सिन्धुलीले गरेको थियो ।
यस्तै आशाका लागि कानुनी सहयोग एड्भोकेशी फोरम नेपालका अधिवक्ता पुष्प पौडेलले निशुल्क गर्ने प्रतिवद्धता जनाएका छन ।
