सिन्धुली/नेकपा केन्द्रीय सदस्य एवम् संघिय सांसद गोमा देवकोटाले युवाहरुको सिर्जनशिल र सक्रिय सहभागिताले देश बन्ने बताएकी छिन । उनले युवाहरुले देश बनाउने जिम्मेवारीलाई गहन रुपमा लिनु पर्ने बताईन ।
सहिद ऋषिराज देवकोटा आजाद स्मृति फुटवल प्रतियोगिताको शुक्रबार भिमानमा उद्घाटन गर्दै उनले यस्तो बताएकी हुन । उनले विगतमा देशको व्यवस्था बदल्न तत्कालिन समयमा धेरै सहिदहरुले बलिदानी गरेको स्मरण गर्दै युवालाई लागु औषध तथा कुलतमा फसेर घर परिवार, समाज तथा राष्ट्रलाई नै हानी नपु¥याउन आग्रह गरिन ।
सहिद आजादकी जीवनसंगिनी समेत रहेकी उनल विगतमा बलिदानी गर्ने सहिदहरुको सपना अहिले संस्थागत भएको बताईन । उनले युवाले सकरात्मक सोचका साथ देशलाई समृद्ध बनाउने महान अभियानमा हातेमालो गर्न सुझाईन ।
यस्तै प्रदेश सांसद लेखनाथ दाहाल (राजन) ले विगतमा सहिदहरुले देखाएको बाटो बाटै देशको ब्यबस्था परिवर्तन भएको स्मरण गराए । उनले सहिदको सपना नै अहिले संस्थागत भएको समेत बताए । शहिद ऋषिराज देवकोटा ‘आजाद’ले देखेको सपना पुरा हुदै गएकाले हामीमा पनि सकरात्मक चिन्तनको खाँचो रहेको बताए ।
उद्घाटन कार्यक्रममा कमलामाई नगरपालिकाका मेयर खड्गबहादुर खत्रीले खेलको सफलताको शुभकामना व्यक्त गर्दै युवा र खेलको विकासका लागि नगरपालिकाले उल्लेख्य काम गर्ने योजना बनाएको बताए । उनले सहिद ‘आजाद’ स्मृति दिवसका अवसरमा कमलामाई नगरपालिकाले पनि भलिवल प्रतियोगिता सञ्चालन गर्ने पनि उद्घोष गरे । खेलका माध्यमबाट कमलामाई नगरपालिकालाई अग्रणि स्थानमा राख्न यस बर्ष ५० लाख रुपैंया बजेट विनियोजन गरिएको जानकारी दिदै उनले हरेक वडामा एक÷एक वटा खेल मैदान हुने र एक वडा एक क्लव गठन गरेर कमलामाई नगरपालिकाले गणतन्त्र दिवस भव्य तरिकाले मनाउने समेत बताए ।
२००० सालमा सिन्धुली कै खुर्कोटमा जन्मनु भएका ऋषिराज देवकोटालाई तत्कालीन शाहि सासनले २०३७ साल फागुन १० गते गिरफतार गरि १२ गते भिमान नजिक खोलामा हत्या गरेको थियो । देवकोटा समाजसेवी, कुसल राजनीतिज्ञ, शिक्षा प्रेमी, गीत तथा साहित्यप्रेमी, खेल प्रेमी तथा बहुआयामिक रहेको उनलाई नजिकबाट चिन्नेहरुले बताउछन् । देवकोटालाई तीन बर्ष अघि केपी ओली नेतृत्वको सरकारले राष्ट्रिय सहिद घोषणा गरेको थियो ।
खेल सञ्चालनका लागि कमलामाई नगरपालिकाले ५ लाख रुपैंया सहयोग गरेको थियो । उक्त खेलमा ८ जिल्लाका १६ टिमको सहभागिता रहने छ । खेल नकआउट सिस्टमबाट सञ्चालन गरिएको छ । उक्त खेल कार्तिक ९ गतेसम्म सञ्चालन हुने छ । खेलमा विजेता हुने टिमलाई १ लाख ७५ हजार नगद पुरस्कार र उपविजेता टिमलाई ७५ हजार पुरस्कार राखिएको छ ।
