सिन्धुली । कमलामाई नगरपालिका सिन्धुलीले चालु आर्थिक वर्षको ९ महिनामा ४४० जना नमुना महिला उद्यमी तयार गर्ने भएको छ । गरिबी निवारणलाई टेवा पु¥याउने तथा दिगो विकासको लक्ष्यलाई आत्मसात गर्दै महिलालाई नमुना उद्यमीका रुपमा उत्पादन तथा प्रवद्र्धन गरिने कमलामाई नगरपालिका सिन्धुलीका प्रमुख खड्ग खत्रीले बताए ।
उनले उद्यमीलाई कमलामाई नगरपालिकाले विना व्याज ऋण लगानी गर्ने भएको जानकारी समेत दिएका छन । नगरपालिकाका महिलालाई आर्थिक उन्नती तर्फ लानका लागि कार्यक्रम लागु गरिएको उनले बताए ।
खत्रीका अनुसार जिल्ला लघु उद्यमी समूह संघ (डिमेगा) सिन्धुली र सिड्स नेपालसँगको सहकार्यमा ती उद्यमीहरु तयार गरि रोजगार बनाईने छ । युएनडिपी तथा कमलामाई नगरपालिकाले उक्त कार्यका लागि आर्थिक लगानी गर्ने भएका छन ।
कमलामाई नगरपालिका सिन्धुलीका उपमेयर मञ्जु देवकोटाका अनुसार लघु उद्यमलाई व्यवस्थित गर्न नगरपालिकाले रणनीतिक कार्ययोजना बनाएर अगाडि बढ्ने बताईन । उनले यो कार्यक्रम पाइलट प्रोजेक्टका रुपमा लागु भएकाले यसलाई सफल बनाउन सबैले हातेमालो गर्नुपर्ने बताईन ।
सिड्स नेपाल सिन्धुलीले होमस्टेमा २१ जना, फोहर व्यवस्थापन उद्यम सञ्चालनमा १६५ जना, गड्यौला मल उत्पादनमा २० जना, एअर कन्डिसन तथा फ्रिज मर्मतमा १५ जना बेसार प्रशोधनमा ६४ जना र मार्वल टायल विछ्याउनेमा १५जना गरि ३ सय जना महिलालाई उद्यमी बनाउने छ भने डिमेगा सिन्धुलीले १४० जना महिलालाई नमुना उद्यमी बनाई रोजगार सृजना गर्ने छ । डिमेगाले ढाका बुनाईमा ३०, दुना टपरी बनाउने २०, नमुना फूल खेतिमा ३०, नमुना केरा खेतिमा ४०, जुनार नर्सरी उद्यमी १० र गार्मेन्ट सञ्चालन उद्यमी १० जना उत्पादन गर्ने भएको छ ।
जसका लागि कमलामाई नगरपालिकाले डिमेगा सिन्धुलीलाई ५१ लाख २५ हजार र सिड्स नेपाललाई ५१ लाख ६ हजार रुपैंया आर्थिक सहयोग गरेको छ । यस्तै युनएनडिपीले डिमेगालाई ५५ लाख ९० हजार ५१५ रुपैंया र सिड्स नेपाललाई ६३ लाख ३३ हजार ७५ रुपैंया सहयोग गरेको छ ।
युएनडिपीबाट प्राप्त बजेटबाट सामाजिक परिचालन, उद्यमशिलता विकास तालिम, क्षमता विकास तालिम, व्यवसायिक योजना निर्माण लगाएतका काम हुने छन भने नगरपालिकाले उद्यमी उत्पादनमा लागेपछि आवश्यक पर्ने मेसिन तथा औजारमा लगानी गर्ने छ ।
महिला नमुना उद्यमशिल विकास परियोजनाका रुपमा उक्त परियोजनाले कमलामाई नगरपालिकाभित्रका १४ वडामा काम गर्ने छ । उक्त कार्यक्रमको बारेमा बुधबार एक कार्यक्रमको आयोजना गरि जिल्लाका सरोकारवाला निकायलाई अभिमुखीकरण सहित जानकारी गराईएको छ ।
