सिन्धुली/सिन्धुलीको तीन पाटन गाउँपालिकाले असार मसान्त आउन लग्दा समेत नीति तथा कार्यक्रम र बजेट ल्याउन सकेको छैन । गाउँपालिकामा समयमा लेखापाल नहुदाँ नीति तथा कार्यक्रम ल्याउन नसकिएको गाउँपालिकाले जनाएको छ ।
गाउँपालिकामा जेठ लागे देखि नै लेखापाल नभएका कारण चालु आर्थीक वर्षमा भएको खर्च विवरण निकाल्न नसकेका कारण समयमा नै बजेट ल्याउन नसकेको गाउँपालिका अध्यक्ष कर्ण थापा मगरले बताए । लेखापालको अभावमा संघिय सरकार , प्रदेश सरकारबाट निर्सत र ससर्त अनुदान वापत आएका रकम कति खर्च भयो भन्ने हिसाव किताव नै निकाल्न नसकेका कारण राज्यको नीति अनुसार असार १० गते नै बजेट ल्याउन नसकिएको अध्यक्ष थापाले बताए । संघिय सरकारले जेठ १५ गते सम्ममा , प्रदेश सरकारले असार १ गते सम्ममा र स्थानीय तहले असार १० गते सम्ममा नीति तथा कार्यक्रम ल्याई सक्नु पर्ने कानुनी व्यवस्था रहेको छ ।
राज्यको कानुनी व्यवस्था एका तीर भएपनि सरकारले कर्मचारी समयमा नपठाउदाँ आफुहरुले राज्यले तोकेको समयमा नीति तथा कार्यक्रम र बजेट ल्याउन नसकोको उनले बताए । आर्थीक वर्षको जेठ महिना लागेसँगै लेखापाल गाउँपालिकाबाट सरुवा भएर गएपछि डेढ महिना गाँउपालिका लेखापाल विहिन भएका कारण गाउँपालिकाको खर्च र मौजुता रकम निकाल्न समय लागेको उनले बताए । लेखा पाल आउने वित्तिकै गाउँपालिकाबाट संचालिन विभिन्न योजनाहरुको रकम भुत्तानी दिनमै लेखाका कर्मचारी व्यस्त भएका कारण नीति तथा कार्यक्रम ल्याउन ढिला भएको अध्यक्ष थापाले बताए ।
असारको पहिलो हप्ता मात्र कोष तथा लेखा नियन्त्रण कार्यालयले हप्तामा तीन दिन काम गर्ने गरी लेखापाल खटाएका कारण हिसाव किताव तथा खर्च विवरण निकाल्न समय लागेकाले बजेट ल्याउन समस्या भएको उनले बताए ।
जिल्लाकै सवैभन्दा बढी बजेट भएको गाउँपालिका
तीनपाटन गाउँपालिका जिल्लाकै सवैभन्दा बढी बजेट भएको गाउँपालिका हो । यस गाउँपालिकाले आर्थीक वर्ष२०७६÷०७७ का लागी करिव ५४ करोडको बजेट ल्याउने तयारी गरेको गाउँपालिका अध्यक्ष थापाले बताए । जिल्लाको सवैभन्दा बढी बजेट भएको गाउँपालिका भएपनि कर्मचारी अभावका कारण कानुनी व्यवस्था अनुसार बजेट ल्यान नसक्नु गाउँपालिकाको दुर्भाग्य भएको उनले बताए । जिल्लाको अन्य गाउँपालिका भन्दा बढी जनसंख्या भएको र बजेट पनि बढी भएको गाउँपालिका भएपनि विकट ठाउँ भएकाले कर्मचारीहरु आउन नमान्ने गरेका कारण गाउँपालिकाले समयमा नै बजेट कार्यान्वय गर्न नसकेको उनले बताए ।
अब गाउँपालिकाको हिसाव किताव तयार भईसकेकाले अव असार २५ गते सम्ममा नीति तथा कार्यक्रम ल्याउने तयारीमा आफुहरु लागेको अध्यक्ष थापाले बताए । कानुनी व्यवस्था अनुसार राज्यले कर्मचारी खटाउन नसक्दा गाउँपालिकाले समय नै कार्य सम्पादन गर्न नसकेको उनले बताए ।
