सिन्धुली । जुनारको राजधानी मानिएको सिन्धुलीको जुनारमा सुँडे मोथ पुतलीको प्रकोप देखिएको छ । गतवर्ष केहि मात्रामा देखिएको यो पुतली यो वर्ष अत्यधिक बढेको छ । सुँडे पुतलीका कारण जुनारमा क्षति पुगेको प्रधानमन्त्री कृषि आधुनिकीकरण परियोजना सिन्धुलीले जनाएको छ ।
सुँडे पुतलीको कुनै औषधि नभएको र रातको समयमा फलमा आएर बस्ने, फलको रस चुस्ने र फल नै झर्ने भएकाले जुनार किसानहरु चिन्तित बनेका छन । जुनार बगैंचाका किसानहरु रातको समयमा जुनार बगैंचा कुर्ने, सुँडे पुतली समाउने र मार्ने काममा लागेका छन ।
पुतलीले रातको समयमा जुनारको फलमा आउने भएकाले रातको समयमा निगरानी गर्नु परेको जुनार सुपरजोनका प्रमुख याम कुमार श्रेष्ठले बताएका छन । गत वर्षहरुमा जुन जुन क्षेत्रमा सुँडे पुतली देखिएको थियो यो वर्ष पनि तिनै ठाउँका बगैंचामा पुतलीको प्रकोप देखिएको श्रेष्ठले जानकारी दिए ।
विशेष गरि गोलञ्जोरका विजयछाप, खनियाँखर्क, नयाँखर्क, तिनकन्या, भदौरे, कुभिण्डे, वेखटाँडी, रानीखोला, ओख्ले, किराँते, सान्ने लगाएतका स्थान र कमलामाई नगरपालिकाको चपौलीमा यो पुतलीको प्रकोप बढेको उनले बताएका छन । उनका अनुसार कतिपय बोटहरु फल झरेर खाली भईसकेका छन । यसको निराकरणका लागि लिसोको पासोमा पार्ने, रातमा समाउने र मार्ने अभियान सुरु गरिएको छ । राती वत्ति बालेपछि पुतली नभाग्ने भएकाले समाउन सकिने श्रेष्ठले जानकारी दिएका छन ।
प्रधानमन्त्री कृषि आधुनिकीकरण परियोजनाले यो पुतलीले जुनारमा कति क्षति पु¥याउँछ भन्ने अहिलेसम्म आँकलन नगरिएको जनाएको छ । रातमा प्राविधिक र जनप्रतिनिधिको अनुगमन पुतलीको प्रकोपका बारेमा अनुगमन गर्न सोमबार जनप्रतिनिधि र प्राविधिक सहितको टोली जुनार क्षेत्रमा पुगेको छ ।
वागमती प्रदेशसभा सदस्य सुष्पा भुजेल, जिल्ला समन्वय समिति सिन्धुलीका प्रमुख कार्साङ लामा, उपप्रमुख शान्ता कार्की, गोलञ्जोर गाउँपालिका वडा नंं ५ का वडा अध्यक्ष गोविन्द लुंगेली, कृषि विकास कार्यालयका प्रमुख र प्रधानमन्त्री कृषि आधुनिकीकरण परियोजनाका प्रमुख याम कुमार श्रेष्ठ, प्राविधिक सहितको टोली सुपरजोन अनुगमनमा पुगेको हो ।
