सिन्धुली । नेकपा एमालेका महासचिव शंकर पोखरेलले मुलुक संकट ग्रस्त अवस्थामा गुज्रिएको बताएका छन । पोखरेलले नेपाल तीन वटा चुनौतीबाट गुज्रिरहेको बताएका हुन ।
शनिबार सिन्धुलीमाढीमा पत्रकारहरुसँग बोल्दै पोखरेलले देश राजनीतिक अस्थिरता र सामाजिक अराजकताबाट उत्पन्न चुनौती, नेपालको मौलिक संस्कृतिलाई कमजोर बनाउने र धार्मिक अतिवादको चुनौती र चरम आर्थिक संकटको चुनौती रहेको बताए ।
प्रेस चौतारी नेपाल सिन्धुलीले आयोजना गरेको पत्रकार सम्मेलनमा बोल्दै पोखरेलले सर्वोच्च अदालतले नजिरका रुपमा स्थापित गरेको व्याख्याको प्रयोग स्वरुप कोशी प्रदेशमा सरकार गठन भएको बताए । उनले अदालतको नजिकर नेपालको संसदिय लोकतन्त्रलाई कमजोर बनाउने खेल भएको दावी गरेका छन ।
विगतमा अदालतको आदेशमा सरकार फेर्दा संविधानको रक्षा गरेको भन्दै फूर्ति लगाउने गठबन्धन अहिले त्यहि संविधानको धारा र अदालतको व्याख्या प्रयोग हुँदा विचलित भएको उनको आरोप छ । कोशीमा बनेको सरकारको विरोध गर्नु भनेको अहिलेको केन्द्रीय सरकारको विरोध गर्नु भएको उनले बताए ।
नेकपा एमाले सिन्धुलीको सातौं जिल्ला अधिवेशन प्रतिनिधि परिषदको प्रथम बैठकलाई सम्बोधन गर्न सिन्धुलीमाढी आएका पोखरेलले पत्रकार सम्मेलनमा बोल्दै पोखरेलले सत्ता पक्ष दाउपेचको राजनीतिमा गएको दावी समेत गरे । उनले एमालेले कोशी प्रदेशमा बैकल्पिक सरकारका लागि मुख्यमन्त्रीलाई साथ दिएको बताउँदै मुख्यमन्त्रीले इमान्दारिता देखाउँदासम्म एमालेको साथ रहने बताए ।
