सिन्धुली । नेकपा (एमाले) ले सिन्धुलीको पार्टी कार्यालय औपचारिक रुपमा सुरु गरेको छ । संसद विघटन भएपछि बन्द रहेको नेकपा (एमाले) को पार्टी कार्यालय अर्थात आजाद स्मृति भवन मंगलबार खोलिएको हो । युवा विद्यार्थीले लगाएको ताला पार्टी अध्यक्ष प्रदीप कटुवालले खोलेर कार्यालय सञ्चालनमा ल्याईएको हो ।
माधव–प्रचण्ड पक्षले पार्टी कार्यालय कब्जा गर्न सक्ने र दस्तावेज हराउन सक्ने भन्दै एमाले ओली निकटका युवा विद्यार्थीले पुस १२ गते पार्टी कार्यालयमा ताला लगाएका थिए । नेकपा एमालेका कार्यकर्ताले आर्थिक, भौतिक लगानी गरेर बनाएको भवन विपक्षीलाई नदिने भन्दै युवा विद्यार्थीले ताला लगाएका थिए ।
उक्त भवनमा दुवै पक्षको दावी हुने भएपछि र दुवै पक्षले एकै समयमा एकै खालका कार्यक्रम आयोजना गर्न थालेपछि स्थानीय प्रशासनले उक्त कार्यालयमा सुरक्षाको व्यवस्था समेत मिलाएको थियो । नेकपा एमालेले मंगलबार विहानै नाचगानसँगै कार्यालयको ताला खोलेका छन । औपचारिक रुपमा एमालेको कार्यालय सञ्चालन गरिएको र अब पार्टीको काम कार्यालयबाटै हुने एमालेका नेता महेन्द्रदेव श्रेष्ठले बताए ।
उनका अनुसार सर्वोच्च अदालतले नेकपाको आधिकारिकता ऋषि कट्टेललाई दिएको र केपी ओली प्रचण्ड नेतृत्वको पार्टीलाई पूर्ववत अवस्थामा फकाईदिएपछि नेकपा एमालेको कार्यालय सञ्चालनमा आएको हो । नेकपा (एमाले) सिन्धुलीले पार्टी कार्यालयमा नेकपा एमालेको बोर्ड झुण्डाईसकेको छ । माधव प्रचण्ड समूहमा गएका नेताहरु समेत नेकपा एमालेको पार्टी कार्यालयमा आएका छन । उनीहरु लगाएतले खुशी मनाउँदै अविरजात्रा तथा नाचगान समेत गरेका छन ।
