सिन्धुली । जिल्लामा आरडिटी किट्सको अभाव हुदा निर्माणका काममा जिल्ला बाहिरबाट आएका कामदारको स्वास्थ्य परिक्षणमा समस्या आएको छ भने क्वारेन्टाईनमा बसेका नागरिकको परिक्षण समेत हुन सकेको छैन । जिल्लाका राष्ट्रिय गौरवका आयोजनाहरुमा काम गर्न तराईबाट आएका मजदुरको परिक्षण हुन नसकेको हो । मरिण गाउँपालिकामा मात्र मदन भण्डारी राजमार्गमा काम गर्न आएका ८२ जना कामदारको आरडिटि परिक्षण हुन सकेको छैन । गाउँपालिका अध्यक्ष पानीराज बम्जनका अनुसार अझै थप २० जना कामदारहरु गाउँपालिका भित्रिने भएका छन । उनका अनुसार ती व्यक्तिको स्वास्थ्य परिक्षणका लागि जिल्लामै आरडिटी किट्सको अभाव भएपछि समस्या भएको छ ।
मरिणमा कालिका कन्ट्रक्सनका ४४ जना र अनक कन्ट्रकसनका ३८ जना मध्ये अनकका २४ जनाको मात्रै आरडिटि परिक्षण भएको छ । अन्यको परिक्षण हुन सकेको छैन । अनक कन्ट्रक्सनले पुल बनाउन अझै २० जना कामदार ल्याउने तयारी गरेको छ । उनीहरुलाई निर्माणको काम गर्ने स्थान र क्याम्पमा मात्र जान गाउँपालिकाले अनुरोध गरेको छ तथापी नागरिकमा भने त्रास फैलिएको उनले बताएका छन ।
यस्तै मध्यपहाडी लोकमार्गमा काम गर्न ठेकेदार कम्पनीले ल्याएका कामदारको पनि स्वास्थ्य परिक्षण हुन नसक्दा फिक्कल गाउँपालिकाका स्थानीयले विरोध जनाएका थिए । फिक्कलमा २० जना कामदार सप्तरीबाट आएका र उनीहरुलाई पनि क्याम्पमा राख्न गाउँपालिकाले अनुरोध गरेको छ । निर्माणको कामका लागि तराई तथा भारतबाट समेत मजदुर आउने र उनीहरुको स्वास्थ्य परिक्षण नहुदा स्थानीयहरु सशंकित भएको स्थानीय तहहरुले जनाएका छन ।
दुधौली नगरपालिका, कमलामाई नगरपालिका, मरिण गाउँपालिका, गोलञ्जोर गाउँपालिका, फिक्कल गाउँपालिका, हरिहरपुरगढी गाउँपालिका, सुनकोशी गाउँपालिकाका क्षेत्रमा ठूला योजनाहरु निर्माणका लागि ल्याईएका कामदारहरु कसैको पनि आरडिटी परिक्षण हुन सकेको छैन । आरडिटी परिक्षणका लागि स्वास्थ्य संस्था तथा सिन्धुली अस्पतालमा आएकाहरुलाई आरडिटि बाहेकका जाँच गरि क्याम्पमा पठाईएको छ ।
यस्तै मरिण कमलामाई र दुधौलीमा रहेका क्वारेन्टाईनमा बसेका २८ जनाको स्वास्थ्य परिक्षण समेत हुन सकेको छैन । कोरोना भाइरसको संक्रमण देखिएका जिल्लाबाट आएका नागरिकलाई स्थानीय तहहरुले क्वारेन्टाईनमा राखेका छन ।
