सिन्धुली । मासिकको प्रसाद खाँदा एकै गाउँका १८ जना विरामी परेका छन् । जिल्लाको दुधौली नगरपालीका वडा नं. ६ हर्षाही माझखर्कमा स्थानीय डम्बरकुमारी दाहालको घरमा पितृ प्रसाद खाएका १८ जना एकै पटक विरामी परेका हुन ।
शनिबार स्व. देव नारायण दाहालको मासिकको प्रसाद खाएका स्थानीयहरुमा आइतबार विहानदेखि ज्वरो आउने टाउको दुख्ने, झाडा बान्ता हुने भएको दुधौली नगरपालिकाका मेयर घनश्याम राउतले बताए ।
विरामी परेकाहरुको दुधौली स्वास्थ्य चौकी र सिर्थौली प्राथमिक स्वास्थ्य केन्द्रका स्वास्थ्यकर्मीको टोलीले गाउँमै पुगेर उपचार गरिरहेको राउतले बताए । विरामी परेकाहरुको त्यहाँ उपचार हुन नसकेमा तत्काल अन्यन्त्र उपचार गर्न लैजान दुई वटा एम्बुलेन्स तयारी अवस्थामा राखिएको पनि उनले जानकारी दिए । स्वास्थ्यकर्मीको टोलीद्वारा सामुहिक रुपमा उपचार भै रहेको र आइतबार साँझसम्ममा क्रमशः सुधार हुदै गएको उनले बताए ।
विरामी हुनेहरुमा ४ घर परिवारका गिता दाहाल, सिता दाहाल, माधव दाहाल, भगवति पौडेल, यसोदा दाहाल, सुस्मिता दाहाल, सन्तोस दाहाल, जीवन दाहाल, हरी दाहाल, सन्जीव दाहाल, सर्मिला दाहाल, विष्णु दाहाल, भक्त कुमारी खत्रि, गोविन्द भट्टराई, कौसल भट्टराई, लालवहादुर भट्टराई, झनक प्रसाद अधिकारी र ललिता पहाडी रहेका छन ।
उनीहरुको उपचारमा दुधौली नगरपालिकाले औषधि उपलब्ध गराएको दुधौली नगरपालिका स्वास्थ्य शाखा प्रमुख तिल्केश्वर यादवले बताए ।
