सिन्धुली । मंगलबार साँझबाट लगातारको वर्षाका कारण आएको पहिरोले गोठ बगाउँदा फिक्कल गाउँपालिका १ महादेवडाँडामा एक महिलाको ज्यान गएको छ भने दर्जनौं घरमा क्षति पुगेको छ । पहिरोले गोठ बगाउँदा ३५ वर्षीया हेमकुमारी सुनुवारको मृत्यु भएको जिल्ला प्रहरी कार्यालय सिन्धुलीले पुष्टि गरेको छ गोठमा रहेका गाईवस्तुलाई घाँस हाल्न गएकी सुनुवारलाई पहिरोले पुरेको प्रहरी इन्स्पेक्टर प्रकाश पौडेलले बताए । घटनास्थमा प्रहरी र गाउँपालिकाको टोली पुगेको उनले बताए ।
चट्याङबाट एक घाइते
सिन्धुलीको गोलन्जोर गाउँपालिका वडा नं. २ बितिजोरमा अविरल वर्षासँगै परेको चट्याङले एक महिला घाइते भएकी छिन । घाइते हुनेमा ४० बर्षिय निर्मला कार्की घाइते भएको स्थानीय सुदिप कार्कीले बताए । घाइतेको स्वास्थ्य चौकी ग्वालटारमा उपचार भईरहेको छ ।
बाग्मतिले चार घर बगायो, बस्ती जोखिममा
लगातार परेको पानीका कारण बागमती र मरिण नदीमा आएको बाढीले हरिहरपुरगढी ३ को वसपार्कमा चार घर बगाएको छ भने ६० भन्दा बढी घर डुवानमा परेका छन । हरिहपुरगढी गाउँपालिकाका अध्यक्ष कार्साङ लामाले दिएको जानकारी अनुसार बागमती नदीले बसपार्कमा रहेका रामशरण राई, खड्ग वाइवा, पूर्णबहादुर घलान र ज्ञानबहादुर घलानको घर बगाएको हो ।
उक्त स्थानका ८ घर उच्च जोखिममा परेका छन् । उद्धार गर्न जान सक्ने अवस्था नरहेको उनले बताए उनीहरु घर छाडेर सुरक्षित स्थानमा सरे पनि गाईवस्तु, अन्नपात, लत्ताकपडा सबै घरसँगै डुबाएको छ । शुक्रबार बिहानबाट नदीले बहाव परिवर्तन गरी बस्तीमा पसेको उनले जानकारी दिए ।
मदन भण्डारी लोकमार्ग निर्माणका लागि कालिका कन्स्ट्रक्सनले जम्मा पारेको ढुंगा, गिट्टी र बालुवाको थुप्रोका कारण नदिले धार परिवर्तन गर्दा गाउँ डुवानमा परेको उनले जनाए । २०५० साल पछि पहिलोपटक यो क्षेत्रमा बाढीले गाउँ डुवानमा परेको हो ।
यस्तै मरिण नदीमा आएको बाढीले मरिण गाउँपालिका ७ को बाह्रविसे डुवानमा परेको छ । त्यहाँका एक दर्जन बढी घर जोखिममा परेका छन् । पाँच घर डुबानमा परेको स्थानीयले जानकारी दिएको मरिण गाउँपालिकाका अध्यक्ष पानीराज बम्जनले बताए । मरिण नदीले सयौं रोपनी धान खेत डुबानमा पारेको उनले बताए । यस्तै मरिण गाउँपालिका ६ को भट्टीडाँडा र सारुभन्ञ्याङको बस्ती पहिरोको जोखिममा परेको बम्जनले बताए ।
विभिन्न सडक अवरुद्ध, खुलाउने प्रयास जारी
चारदिनदेखि लगातार परेको पानीका कारण सिन्धुलीका विपी राजमार्ग, मध्यपहाडी राजमार्ग र मदनभण्डारी राजमार्ग सहित दर्जनौं सडकहरु अवरुद्ध भएका छन । राजमार्गहरुमा पहिरोका कारण सवारी साधान आवागमन अवरुद्ध भएको छ । वीपी राजमार्गको नेपालथोक सिन्धुली खण्ड र सिन्धुली खुर्कोट सडक खण्ड, मध्य पहाडी लोकमार्गको खुर्कोट घुर्मी खण्डको ठाउँठाउमा पहिरो खसेपछि सडक अवरुद्ध भएको जिल्ला प्रहरी कार्यालय सिन्धुलीले जनाएको छ ।
यस्तै सुनकोसी गाउँपालिका १ को कमारे, गोलञ्जोर गाउँपालिकाको खनियाँखर्क नजिकै सडकमा खसेको पहिरोले पनि आवतजावत छेकेपछि अवरुद्ध भएको सडक साँझबाट एकतर्फी खुलेको जिल्ला प्रहरी कार्यालय सिन्धुलीका इन्सपेक्टर प्रकाश पौडेलले बताए । अन्य सडकहरु खुलाउने प्रयास गरिएको उनले जानकारी दिए ।
मध्यपहाडी लोकमार्गको गोलन्जोर गाउँपालिकाभित्र पर्ने कुहीभिर, सुगुरे, बलेनी, हैबार लगायतका ठाउँमा पहिरो खसेको छ भने फिक्कल गाउँपालिकाको बाँदरे, खाङसाङ खोलामा पहिरा सहित आएको बाढीले सडक अवरुद्ध गरेको छ । यस्तै जिल्लाभित्र सञ्चालन भएका सडकहरुमा खहरे र पहिरोका कारण यातायात सञ्चालन हुन सकेका छैनन ।
यसैबीच जिल्ला प्रशासन कार्यालय सिन्धुलीले बाढी पहिरोको उच्च जोखिमलाई मध्येनजर गरि सुरक्षित रहन र तत्काल सूचना दिन आग्रह गर्दै सूचना समेत जारी गरेको छ ।
