सिन्धुली । पत्रकार कुटपिट घटनाको छानविनका ५ सदस्यीय छानविन समिति गठन गरिएको छ । नेपाल पत्रकार महासंघ सिन्धुली शाखाका सभापति होमकुमार कार्की (राजन) र पुर्व सभापति मिनकुमार दाहालमाथि असार २१ गते भएको सांघतिक आक्रमणको सत्य, तथ्य र यथार्थ पत्ता लगाउन नेपाल पत्रकार महासंघ केन्द्रले शुक्रबार ५ सदस्यीय टोली गठन गरिएको हो ।
नेपाल पत्रकार महासंघका केन्द्रीय महासचिव रमेश बिष्टको संयोजकत्वमा गठन गरिएको समितिले एक हप्ता भित्र प्रतिवेदन सार्वजनिक गर्ने छ । छानविन समितिमा नेपाल पत्रकार महासंघका केन्द्रिय सदस्य द्धारिका काफ्ले, सिन्धुली शाखाका पूर्व अध्यक्ष राजकुमार कार्की, सञ्जय दाहाल र प्रदेश नं. ३ का सदस्य बद्री नयाँघरे रहेका छन् ।
जिल्ला प्रहरी कार्यालय सिन्धुलीमा कार्यरत प्रहरी हवल्दार सलामसिंह लामा र जवान विकास स्याङतानले कुटपीट गरेपछि घटनाको छानविन र कानुनी कारवाहिमा गैरजिम्मेवार देखिएपछि घटनाको छानविन गर्न समिति बनाईएको नेपाल पत्रकार महासंघले जनाएको छ ।
पत्रकार महासंघको केन्द्रीय छानविन समितिले सार्वजनिक गरिएको प्रतिबेदनका आधारमा मुद्दा प्रक्रियामा जाने समितिका संयोजक विष्टले बताए । उनका अनुसार घटनाको छानविनको प्रतिवेदन सोमबारसम्म तयार गरिने छ ।
यस्तै घटनाको बारेमा बुझ्न सिन्धुली आएका महासचिव विष्टले जिल्लाका पत्रकारहरु, नागरिक समाजका अगुवाहरु, जनप्रतिनिधिहरु र प्रमुख जिल्ला अधिकारी जनार्दन गौतम सहित सुरक्षा निकायका प्रमुखसँग घटनाका बारेमा छलफल समेत गरेका छन ।
छलफलमा नागरिक समाजका अगुवाले घटना निन्दनीय भएको भन्दै पीडितका न्यायका लागि सहयोग गर्ने प्रतिवद्धता व्यक्त गरेका छन । यस्तै
प्रमुख जिल्ला अधिकारी जर्नादन गौतम र प्रहरी उपरीक्षक चक्रबहादुर सिंहले पत्रकारहरुमाथि भएको आक्रमणका दोषीहरुलाई कारवाही गर्ने प्रतिबद्धता व्यक्त गरेको महासंघका केन्द्रीय सदस्य द्वारिका काफ्लेले बताए ।
