सिन्धुली । लगातारको वर्षाका कारण आएको बाढी र पहिरोका कारण सिन्धुलीमा एक जनाको मृत्यु भएको छ भने ६ जना वेपत्ता भएका छन । बाढीका कारण शनिबार ८६ जनालाई सुरक्षित स्थानमा सारिएको जिल्ला प्रहरी कार्यालय सिन्धुलीले जनाएको छ ।
कमला नदीमा आएको बाढीले राती १ बजे घर सहित परिवारै बगाउँदा एकजना बालकको मृत्यु भएको छ । बाढीले बगाउँदा दूधौली नगरपालिका–१, डकाहामा बस्ने ६ जनाको परिवारै बगाँउदा रेणु कापरीको ३ वर्षिय छोरा कार्वन कापरीको मृत्यु भएको प्रहरीले जनाएको छ ।
तीन जना बेपत्ता छन् । दुई जनाको उद्धार गरिएको प्रहरीले जनाएको छ । डकाहा बजार नजिककै कमला नदी किनारमा त्रिपाल टाँगेर बसेको उक्त परिवारलाई नदिले बगाएको हो । उनीहरु सर्लाहीबाट त्यहाँ आएर बसेका थिए ।
प्रहरी प्रमुख एसपी चक्रबहादुर सिंहका अनुसार मृतक बालकको दूधौली नगरपालिका–४, बैरामा शव भेटिएको हो । रेणुकै १ वर्षीय छोरा सर्गम र सात वर्षीय आधि बेपत्ता छन् । यस्तै नदीले बगाएर बेपत्ता हुनेमा सर्लाही घर बताउने ६० वर्षीय मरणी कापरी रहेको प्रहरीले जनाएको छ । बाढीले बगाएका मिथुन र रेणुलाई प्रहरीले सकुशल उद्धार गरेको छ ।
त्यस्तै दूधौली–१ कै हाटगाउँ बस्ने जितबहादुर सार्कीको गोठमा सुतिरहेको अवस्थामा नदीले गोठ सहित उनलाई बगाएकोमा सार्की रुखमा चढेर बाँचेका छन । एसपी सिंह का अनुसार सोहि स्थानको सिता शाहको घरका अन्य १६ जनालाई पनि घर पूर्ण रुपमा बाढीले बगाएपछि छिमेकीको घरमा सारिएको छ । यस्तै अन्य ७० जना स्थानीलाई पनि स्थानान्तरण गरिएको छ ।
पहिरोले पुर्दा तीनजना वेपत्ता
शनिबार दिउँसो आएको पहिरोका कारण दुधौली नगरपालिका वडा नं. १२ जिनाखु बुनिटारका एकै घरका तीन जना वेपत्ता भएका छन भने १ जनाको उद्धार गरिएको छ । स्थानीय हिरा बहादुर पौडेलको घर माथिबाट आएको पहिरोले पुरिदा उनकी श्रीमति ३० वर्षिय सुनिता पौडेल, छोरी १० वर्षकी सविता पौडेल र छोरा सागर पौडेल वेपत्ता भएको जिल्ला प्रहरी कार्यालय सिन्धुलीले जनाएको छ ।
हिरा बहादुरको भने उद्धार गरि स्थानीय स्वास्थ्य संस्थामा उपचार गरिएको र उनको अवस्था सामान्य रहेको प्रहरीले जनाएको छ ।
लेदोले पुरिएको गाडी निकालियो, चालक घाइते
वर्षाकै कारण सुनकोशी गाउँपालिका–१, कमेरेमा गए राती साढे १० बजे खसेको पहिरोमा पुरिएको को १ च ८९५६ नम्बरको पिकअप बोलेरो शनिबार निकालिएको छ ।
विपी राजमार्गमा माथिबाट खसेको लेदोका कारण फसेको गाडीको दुम्जा प्रहरी चौकीका प्रहरीले निकालेका हुन । गाडीका चालकको सकुशल उद्धार गरिएको छ । घाइते चालक सिराहा गोलबजार नगरपालिका–३ का इन्दल शाहलाई उद्धार गरी हेलिकोप्टर मार्फत् उपचारका लागि काठमाडौं पठाईएको प्रहरीले जनायो । शुक्रबार पहिरोले गोठ बगाउँदा फिक्कल गाउँपालिका १ महादेवडाँडामा ३५ वर्षीया हेमकुमारी सुनुवारको मृत्यु भएको थियो ।
