सिन्धुली । आकस्मिक रक्त सञ्चार सेवा केन्द्र (ब्लड बैंक) सिन्धुलीले जिल्ला बाहिर पनि रगत वितरण गर्न थालेको छ । नेपाल रेडक्रस सोसाईटी सिन्धुलीले सञ्चालन गरेको सेवा केन्द्रले रगत अभाव भएका बागमती प्रदेशभरका अस्पतालमा आकस्मिक रगत उपलब्ध गराउन सुरु गरेको हो ।
केन्द्रले संकलन गरेको रगत आवश्यकता अनुसार जिल्ला बाहिर पठाउन थालेको आकस्मिक रक्त सञ्चार सेवा केन्द्रका इन्चार्ज कुसुम सुबेदीले बताईन । उनका अनुसार आर्थिक वर्ष २०८१/०८२ मा १ हजार पाउण्ड रगत संकलन भएकोमा २ सय ६४ पाउण्ड रगत जिल्ला बाहिर पठाईएको छ भने ७ सय ३६ पाउण्ड रगत जिल्लाभित्रै खपत भएको छ ।
जिल्लामा आर्थिक वर्ष २०८१÷०८२ मा १ सय ८६ जना पुरुष र ५ सय ५० जना महिलाले केन्द्रबाट सेवा लिएका छन । केन्द्रले जिल्लाभित्र उपलब्ध गराउने रगत निःशुल्क उपलब्ध गराईरहेको छ । आगामी दिनमा बागमती प्रदेशभर निःशुल्क रगत उपलब्ध गराउने केन्द्रको लक्ष रहेको सुवेदीले बताईन ।
उनका अनुसार सबैभन्दा बढी सिन्धुली अस्पतालमा सुत्केरी हुन आउने महिलाहरुले केन्द्रबाट रगत लिने गरेका छन । त्यस्तै रक्तअल्पता, थाइल्स, डाईलाइसिस गर्नुपर्ने मृगौलाका बिरामी, ब्लड क्यान्सर जस्ता बिरामीको लागि बढी रगत आवश्यक परेको सुबेदीले जानकारी दिईन ।
उनका अनुसार नेगेटिभ ग्रुपको रगतको भने जिल्लामा अभाव रहेको छ । नेगेटिभ ग्रुपको रगत भएका व्यक्तिहरुलाई सम्पर्कमा राखेर सकेसम्म रगतको अभाव कम गर्ने कोशिस भईरहेको पनि उनले बताईन । आकस्मिक रक्त सञ्चार सेवामा ३६ वटा सहयोगी सघंसस्थाहरु मार्फत नियमित रक्तदानका कार्यक्रमहरु आयोजना गर्ने गरिएको पनि उनले जानकारी दिईन ।
कहिलेकाहिँ इच्छुक रक्तदाताहरुले समेत रक्तदान गर्ने गरेका छन । पछिल्लो समय रक्तदान सम्बन्धि जनचेतना समेत बढेकाले रगतको परिपूर्तिमा सहजता आएको उनले बताईन । चालु आर्थिक आर्थिक वर्षमा १ हजार २ सय पाउण्ड रगत संकलन गर्ने लक्ष लिएको पनि सुबेदीले बताईन ।
