सिन्धुली । बुधुनाखोला खानेपानी आयोजनाको मुहानमा विवाद भएको छ । मुहानमा आएको विवाद समाधानमा स्थानीय तहका जनप्रतिनिधिले चासो नदिई विवाद गराउनतर्फ लागेको भन्दै खानेपानी आयोजनाका उपभोक्ताले बुधबार दिनभर कमलामाई नगरपालिका कार्यालय रित्तो गाग्री सहित घेराउ गरेका छन ।
उपभोक्ताले रित्तो गाग्री सहित सिन्धुलीमाढी बजारमा प्रदर्शन समेत गरेका थिए । वडा नं. १२ का सबै घरधुरी खानेपानीको माग गर्दै सिन्धुलीमाढीमा रहेको कमलामाई नगरपालिकाको कार्यालय घेराउ गर्न आएका छन । वडाका तीनसय बढी नागरिकले खानेपानी पहिलो प्राथमिकता रहेकाले खानेपानी खान पाउनुपर्ने माग गरेका छन ।
कमलामाई नगरपालिका वडा नं. १२ का स्थानीयहरुले मुहानको विवाद समाधान गर्न वडा नं. ११ र १२ को वडा अध्यक्षहरु र कमलामाई नगरपालिकाले चासो नदिएपछि आन्दोलन गर्नु परेको आन्दोलनमा आएका उपभोक्ताहरुले बताएका छन ।
कमलामाई नगरपालिका वडा नं. ११ का किसानहरुले कनपा १२ का उपभोक्तालाई खानेपानी आयोजना निर्माण गर्न नदिएपछि मुहानमा विवाद आएको स्थानीय विनोद श्रेष्ठले बताए । मुहानदेखि ७ किलोमिटर तलका बासिन्दाले विवाद गर्नुपर्ने कुनै कारण नभएको र आयोजना सुरु हुने समयसम्म कुनै विवाद नभएको उनले बताए । आफ्नै वडाको एक मात्र खानेपानीको श्रोतको मुहान भएको र आफ्नै वडाको श्रोतको समेत प्रयोग गर्न नपाएको उक्त आयोजनाका उपभोक्ताहरुको गुनासो छ । स्वास्थ्यका लागि पानी (नेवा) को आर्थिक सहयोगमा बन्न लागेको उक्त आयोजनाको निर्माणको काम सुरु भइसकेको थियो । एक किलोमिटर पाईपलाईन खनिसकेपछि आयोजनाको निर्माणको काममा कनपा ११ का स्थानीयले विवाद गरेपछि खानेपानी आयोजना निर्माणको काम रोकिएको छ ।
उक्त आयोजना कमलामाई नगरपालिकाको ३१ लाख, २७ लाख जनश्रमदान र नेवाको ७२ लाख सहयोग गरि १ करोड ३० लाख लगानीमा निर्माण हुँदै छ । आयोजनाबाट कनपा १२ का १६० घरधुरीलाई खानेपानी आपूर्ति गर्ने लक्ष रहेको छ । आयोजनाको मुहान दर्ता भईसकेको र आयोजनाको निर्माणको काम सुरु भईसकेको तर राजनीतिक रङ दिएर जनप्रतिनिधिहरुले नै विवाद सृजना गरेको उनीहरुको आरोप छ ।
मेयर उपेन्द्र पोखरेलले खोलाको पानी लान पाईदैन भनेपछि आन्दोलन गर्न बाध्य भएको उपभोक्ताले बताएका छन । ‘वडा नं. ११ नम्बरका जनताले सिंचाई गर्न पाउने, वडा नं. १२ का जनताले खानेपानी खान नपाउने यस्तो पनि न्याय हुन्छ ?’, श्रेष्ठले भने । मेयरको डिजाईनमा पूर्वाग्रही तरिकाले खानेपानी आयोजना निर्माणमा राजनीति गरेको स्थानीयको आरोप छ ।
उनीहरुका अनुसार कनपा ११ का बासिन्दाहरुलाई पटक पटक वार्तामा बोलाईएको भए पनि वार्तामा नआएपछि आन्दोलनमा आउनुको विकल्प नभएको समेत बताए । खानेपानी मुहानको विवादका सम्बन्धमा जानकारी दिन आन्दोलनरत पक्षले संयुक्त प्रेस विज्ञप्ती समेत जारी गरेका छन । विज्ञप्तीमा खानेपानी आयोजनाका अध्यक्ष रविलाल नेपाली, कनपा १२ मा रहेका राजनीतिक दलहरु नेकपा एमाले, नेपाली कांग्रेस, नेकपा माओवादी केन्द्र र राप्रपाका प्रतिनिधिले हस्ताक्षर गरेका छन ।
कनपा ११ का सिंचाईका उपभोक्ताहरुले आन्दोलन गरेपछि कमलामाई नगरपालिकाको कार्यपालिका बैठक बसेको छ । बैठकले मेयर उपेन्द्र पोखरेलको संयोजकत्वमा विवाद समाधान कार्यदल निर्माण भएको छ । ७ दिनभित्र प्रतिवेदन पेश गर्ने गरि समिति निर्माण गरिएको छ । समितिमा कनपा ७ का वडा अध्यक्ष कर्ण बहादुर घिसिङ, कनपा ५ का वडा अध्यक्ष पूर्ण बहादुर खड्का, कनपा ११ का वडा अध्यक्ष राम बहादुर थिङ, कनपा १२ का अध्यक्ष भिम बहादुर गुर्मछान, राष्ट्रिय दलका वडा नं. ११ र १२ का प्रतिनिधिहरु, योजना तथा पूर्वाधार शाखा प्रमुख, नेवाको प्राविधिक १ जना, वन, वातावरण, विपद तथा खानेपानी शाखा प्रमुख सदस्य सचिव रहने गरि कार्य दल बनाएको छ । कार्यदल निर्माण भएपछि केहि दिनका लागि उपभोक्ताले आन्दोलन स्थगित गरेका छन ।
