सिन्धुली । जिल्ला प्रहरी कार्यालय सिन्धुलीले जिल्लाका छ स्थानमा यात्रु सहायता कक्ष स्थापना गरेको छ । चाडवाडका बेलामा काठमान्डौबाट सिन्धुली तथा अन्य जिल्ला जाने र जिल्लाबाट काठमान्डौ लगाएत अन्य जिल्लामा जाने यात्रुहरुको यात्रालाई सुरक्षित र सहज बनाउनका लागि यात्रु सहायता कक्ष स्थापना गरिएको हो ।
सिन्धुली प्रहरीले तीन वटा ठूला राजमार्गलाई लक्षित गरि यात्रु सहायता कक्ष स्थापना गरेको छ । मदनभण्डारी राजमार्ग, मध्यपहाडी राजमार्ग र विपी राजमार्गमा यात्रा गर्ने यात्रुको सुरक्षा तथा सवारी दुर्घटनाको न्युनिकरण गर्ने उद्देश्यले यात्रु सहायता कक्ष स्थापना गरिएको जिल्ला प्रहरी कार्यालय सिन्धुलीका प्रमुख एसपी गोविन्दराज काफ्लेले बताए ।
कमलामाई नगरपालिकाको सिन्धुलीमाढी बसपार्क र भिमान, गोलञ्जोर गाउँपालिकाको खुर्कोट, मरिण गाउँपालिकाको कपिलाकोट छाप, दुधौली नगरपालिकाको डकाहा र दुधौली बजारमा एकै पटक यात्रु सहायता कक्षको स्थापना गरि उद्घाटन गरिएको एसपी काफ्लेले जानकारी दिए ।
कमलामाई नगरपालिकाका बसपार्कमा यात्रु सहायता कक्षको स्थापना कार्यक्रममा जिल्लाको चाडपर्व लक्षित सुरक्षा योजना समेत सार्वजनिक गरिएको छ । जसका लागि जिल्लाभर सुरक्षा व्यवस्थालाई व्यवस्थित गर्न ५ सय ५५ जना सुरक्षाकर्मी आइतबारदेखि नै लागु हुने गरि परिचालन गरिएको समेत एसपी काफ्लेले बताए ।
उनका अनुसार कार्यालय सुरक्षा, कमाण्ड पोष्ट, सप्राईज चेकिङ, रात्री गस्ती, राजमार्ग सुरक्षा, वसपार्क टिकट काउन्टरको चेकजाँच तथा अनुगमन, दैनिक मापसे÷लापसे चेकिङ, मोवाईल गस्ती, राजमार्ग गस्ती, पिकेट ड्युटि लगाएतका ड्युटि तय गरिएको छ । यस्तै प्रहरीले सरकारी कार्यालय, धार्मिक स्थल, बैंक तथा वित्तिय संस्था, महत्वपूर्ण प्रतिष्ठान, उद्योग तथा कलकारखाना, विशिष्ट व्यक्तिहरुको सुरक्षा, राजनैतिक कार्यक्रमको सुरक्षार्थ सुरक्षाकर्मी परिचालन गरिने भएको छ ।
प्रहरीले चाडवाडमा हुन सक्ने झैझगडा, जुवातास, लंगुरबुर्जा नियन्त्रणमा समेत सक्रियता बढाउने छ । यस्तै बजार अनुगमन, अस्पताल सुरक्षा समेत प्रहरीको प्राथमिकतामा रहेको छ । यस्तै चाडवाडमा हुन सक्ने दुर्घटनाहरुमा रेस्क्युका लागि पनि टिम रहनेछन । प्रहरीले नागरिक सचेतनालाई पनि सुरक्षा योजनामा समेटेको छ ।
सिन्धुलीमाढीमा स्थापना गरिएको यात्रु सहायता कक्षको उद्घाटन गर्दै जिल्ला समन्वय समितिका प्रमुख कारसाङ लामाले शान्ति सुरक्षा स्थापनाको दायित्व सबैको रहेको बताउँदै सवै राजनीतिक दल, संघसंस्था, सञ्चारकर्मी, प्रहरी लगाएत सबैले शान्ति सुरक्षा स्थापनामा सहयोग गर्नुपर्ने बताए ।
कार्यक्रममा बोल्दै प्रमुख जिल्ला अधिकारी लिला प्रसाद शर्माले अन्य दिनको तुलनामा चाडवाडको बेला यात्रु आवागमन बढी हुने भएकाले असुरक्षाजन्य गतिविधिहरु नहुन भन्ने, यात्रुहरु सुरक्षित ढंगले गन्तव्यमा पुग्न सकुन भनेर यात्रु सहायता कक्ष स्थापना गरिएको बताए ।
प्रजिअ शर्माले शान्ती सुरक्षा स्थापना गर्न सरकारी संयन्त्र र सुरक्षाकर्मीहरु एक्लैले सम्भव नहुने भन्दै सबैलाई सहयोग गर्न अनुरोध समेत गरेका छन ।
कार्यक्रममा बोल्दै विपी यातायात प्रा.लिका अध्यक्ष कान्छामान वलले राष्ट्रिय विपदका बेलामा जोखिमपूर्ण यात्रा गर्नुपरे पनि यातायात व्यवसायीले तोकिएको भन्दा बढी भाडा नलिने र नियमित अनुगमन गरिने बताए । उनले सुरक्षा संयन्त्र र प्रशासनलाई नियमित अनुगमन गरिदिन समेत आग्रह गरे ।
