सिन्धुली । पूर्व राष्ट्रपति विद्यादेवी भण्डारीले गुणस्तरीय शिक्षाका लागि स्थानीय समुदायको सहयोग र अपनत्व आवश्यक रहने बताएकी छिन् । गौमती माध्यामिक विद्यालयको ३ वटा नवनिर्मित भवनको उद्घाटन गर्दै भण्डारीले विद्यालयहरु आधुनिक शिक्षा र प्राविधिक शिक्षाको केन्द्रको रुपमा विकास हुनु पर्नेमा जोड दिईन् ।
भण्डारीले सामुदायिक विद्यालयको शिक्षा गुणस्तरीय हुन स्थानीय समुदाय, शिक्षक, व्यवस्थापन समितिको सक्रिय सहभागिता आवश्यक रहेको बताईन् । उनले भुकपम्पछि सरकारले विद्यालय भवनहरु पुनःनिर्माणमा उल्लेख्य योगदान गरेको बताउँदै आधुनिक भवन इटा, सिमेन्ट र फलामका संरचना मात्र नभई भावी पुस्ताका आकांक्षा र सम्भावनाका प्रतिविम्व रहेको बताईन् ।
सुरक्षित, सुव्यवस्थित र प्रविधिमैत्री शिक्षा लिन पाउनु विद्यार्थीको अधिकार समेत रहेको बताएकी भण्डारीले विद्यार्थीलाई परीक्षा उत्तिर्ण गराउनु मात्र नभई उद्यमशिल जनशक्ति उत्पादन गर्नु अहिलेको आवश्यकता रहेको बताईन् ।
उनले विद्यार्थीको सफलता नै परिवार, समाज र राष्ट्रको सफलता भएको बताउँदै जलवायु परिवर्तन, प्रविधिको विकाससँगै प्रतिस्पर्धा गर्ने जनशक्ति उत्पादनमा ध्यान दिन आवश्यक रहेको बताईन । उनले दक्ष शिक्षक, प्रविधिमैत्री विद्यालय र सुविधासम्पन्न भौतिक संरचनासँगै असल नागरिक उत्पादन गर्ने दायित्व विद्यालयको रहेको बताईन् ।
