सिन्धुली । विभिन्न स्थानबाट लागु औषध, मोटरसाइकल सहित तीन जनालाई प्रहरीले नियन्त्रणमा लिएको छ । दुधौली नगरपालिका ११ राजाबास स्थित भित्री सडक खण्डमा लागुऔषध निटजासेन सहित दुधौली नगरपालिका ११ राजबासका बाल कुमार मगर र सोही ठाउँका टेकेन्द्र मगरलाई मंगलबार पक्राउ गरेको जिल्ला प्रहरी कार्यालय सिन्धुलीले जनाएको छ ।
उनीहरुको साथबाट निटजासेन १० लेखिएको ३ सय ८९ ट्याव्लेट बरामद गरिएको जिल्ला प्रहरी कार्यालय सिन्धुलीका ड्रिएसपी सूर्य प्रकाश सुवेदीले जानकारी दिए । प्रहरीलाई देख्ने बित्तिकै भाग्न खोज्दा शंका लागि इलाका प्रहरी कार्यालय डकाहाबाट खटिएको गस्ती टोलीले उनीहरुलाई नियन्त्रणमा लिएको थियो ।
त्यस्तै मदनभण्डारी राजमार्ग अन्तर्गत कमलामाई नगरपालिका वडा नं. ९ बाट लागु औषध सहित बर्दिबासबाट भिमानतर्फ आउँदै गरेको बा८५प६०२६ नम्बरको मोटरसाइकल नियन्त्रणमा लिएको थियो । लागुऔषध जस्तो देखिने झोल पदार्थ र ट्याब्लेट शुक्रबार प्रहरीले फेला पारेको हो । प्रहरीले एक्सप्लोन न्यू ३० बोतल, अनसेन १० बोतल, स्याम्मो ८० पिस र नाट्राजेपाम १० पिस सहित मोटरसाइकल र मोटरसाइकल चालक जिवन कुमार बस्नेतलाई नियन्त्रणमा लिएको सुबेदीले बताए ।
उक्त मोटरसाइकललाई पछ्याउँदै जाँदा मदनभण्डारी राजमार्ग अन्तर्गत कनपा ९ काउछे स्थित भित्री सडक खण्डमा बस्नेतले बोरामा रहेको लागुऔषधलाई छोडी जगंलतर्फ भागेका थिए ।
उनलाई खोजतलासी गर्ने क्रममा प्रहरीले नियन्त्रणमा लिई बुधबार सार्वजनिक गरेको हो । उनलाई विशेष सूचनाको आधारमा इलाका प्रहरी कार्यालय भिमानबाट खटिएको टोलीले नियन्त्रणमा लिएको थियो ।
