सिन्धुली । सिन्धुली अपांग महिला संघले आइतबार संस्थाको पाँचौ स्थापना दिवस सिन्धुलीमाढीमा मनाएको छ । संस्था स्थापनाको पाँचौ वर्ष पुरा भएको अवसरमा क्यालेण्डर विमोचन तथा अन्तक्र्रिया कार्यक्रम गरिएको छ ।
संस्था स्थापना दिवसको अवसरमा संघले २०८१ सालको क्यालेण्डर विमोचन गर्नुका साथै अपांगता भएका महिलाहरुको यौनिकता एवम प्रजनन स्वास्थ्य अधिकारसम्बन्धि अन्तक्र्रिया कार्यक्रम समेत गरिएको हो ।
कार्यक्रममा संस्थाले अपांगता भएका व्यक्तिहरुको हित र अधिकारका सवालमा उल्लेख्य काम गरेको कार्यक्रमका वक्ताहरुले बताएका छन ।
संघका अध्यक्ष दिलकुमारी देवकोटा (दीपा)को अध्यक्षता एवम् कमलामाई नगरपालिकाका उपप्रमुख मञ्जु देवकोटाको प्रमुख आतिथ्यतामा भएको कार्यक्रममा बोल्ने अधिकांश वक्ताले संस्थाले गरेको कामको प्रशंसा समेत गरे ।
कार्यक्रममा बोल्दै नगर उपप्रमुख मञ्जु देवकोटाले अपांगता भएका व्यक्तिको अधिकार रक्षाका लागि सक्दो सहयोग गर्ने बताईन । उनले अपांगता भएका व्यक्तिले राज्य विमुख हुन नपर्ने गरि स्थानीय तहले काम गर्ने बताईन । कमलामाई नगरपालिकाले भौतिक संरचना अपांगता मैत्री बनाउन र नगरपालिकामा अपांगता हेल्पडेक्स निर्माण छिट्टै गर्ने बताईन ।
कार्यक्रममा बोल्दै पत्रकार बिमला पाण्डेले अपांगता भएका महिला तथा बालिकाहरु यौनजन्य हिंसाबाट प्रभावित बनिरहेको र उनीहरुको न्यायमा पहुँच नपुगेको बताईन । उनले यौनिकता, प्रजनन अधिकारका सवालमा खुलेर छलफल र बहस हुन नसकेको पनि उनले बताईन । उनले अवको अपांगता आन्दोलन यौनिकता र प्रजनन अधिकारतर्फ केन्द्रीत हुन आवश्यक रहेको बताईन ।
कार्यक्रममा बोल्दै नवज्योति वहिरा माविका प्रधानाध्यापक विजय लामाले स्थानीय तहले अपांगताका सवालमा प्रभावकारी काम गर्न वडास्तरमा समन्वय संयन्त्र निर्माण गर्नुपर्ने सुझाव दिए । कार्यक्रममा संस्थाका कोषाध्यक्ष वविता थापाले स्वागत गरेकी थिईन भने किरण श्रेष्ठले सहजीकरण गरेका थिए ।
