सिन्धुली । पछिल्लो समय सिन्धुली अस्पतालको सेवामा समस्या सृजना हुदै आएको छ । एकातिर नागरिकले समयमा उचित सेवा नपाउने त छदैंछ स्वास्थ्यकर्मीले समयमा तलब समेत पाउन नसक्दा अस्पतालमा अर्को समस्या थपिएको छ । सेवामा समस्या आएको गुनासो बढेसँगै कार्यरत डाक्टरले नै समयमा तलब नपाएका गुनासा बाहिर आएका छन ।
असोजदेखि हालसम्म कार्यरत डाक्टरहरुले तलब पाउन सकेका छैनन । छात्रवृति करारमा सिन्धुली अस्पतालमा कार्यरत १४ जना डाक्टरले असोज, कार्तिक मंसिर र चाडवाड खर्च गरि चार महिनाको तलब नपाएको गुनासो गरेका छन ।
अस्पतालले तलब दिन नसकेपछि डाक्टरहरुले स्वास्थ्य मन्त्रालय धाउनुपरेको छ । अस्पतालमा विरामीको उपचार गर्नुपर्ने डाक्टरहरु आफ्नै पारिश्रमिकका लागि मन्त्रालय धाउनुपरेपछि अस्पतालको सेवामा समेत समस्या आउने देखिएको छ । सिन्धुली अस्पतालमा ५ जना विशेषज्ञ, २ जना नर्सिङ स्टाफ सहित १४ जनाले तलब पाउन सकेका छैनन । उनीहरुले हालसम्मको पारिश्रमिक उपलब्ध गराईदिन अनुरोध गर्दै स्वास्थ्य तथा जनसंख्या मन्त्रालयलाई पत्र लेखेका छन ।
उनीहरुले यथाशिघ्र हालसम्मको पारिश्रमिक र दशैँ तिहारको चाडबाड खर्च उपलब्ध गराउन पत्रमार्फत माग गरेका छन । स्वास्थ्य मन्त्रालयका सचिवलाई सम्बोधन गर्दै पत्र लेखेका स्वास्थ्यकर्मीले दैनिक गुजारा चलाउन समेत समस्या भईरहेको उल्लेख गरेका छन । उनीहरुले हालसम्मको तबल मात्र मागेका छैनन अब उप्रान्त नियमित तथा सहज रुपमा समेत पारिश्रमिकको व्यवस्था गरिदिन आग्रह समेत गरेका छन । उनीहरुले स्वास्थ्य विभाग, बागमति स्वास्थ्य मन्त्रालयलाई समेत बोदार्थ दिएका छन ।
छात्रवृति करारका स्वास्थ्यकर्मीहरुलाई संघिय सरकारले तलब पठाउनुपर्ने हुन्छ । चार महिनादेखि सरकारले तलब नपठाएपछि डाक्टरहरुले लिखित रुपमै तलब माग गरेका हुन ।
सरकारले असोजदेखिको तलब नपठाएको सिन्धुली अस्पतालका डा. प्रेरित देवकोटाले बताए । उनका अनुसार देशभरका छात्रवृति करारका स्वास्थ्यकर्मीहरुले तबल पाएका छैनन । तलब नपाउनुको कारण भने जानकारी नभएको उनले बताए ।
सिन्धुली अस्पताल विकास समितिमा समेत आन्तरिक कोषमा पैसा अभाव भएका कारण अस्पतालले सोधभर्ना गर्ने गरि पनि तलब खुवाउन नसकेको सिन्धुली अस्पताल विकास समितिका अध्यक्ष सतिशचन्द्र ढकालले बताएका छन ।
उनका अनुसार अस्पतालले २ महिनाको तलब आन्तरिक कोषबाट खुवाएको भए पनि अब तलब खुवाउन नसक्ने भएको छ । चाडवाड मान्न समेत डाक्टरलाई अभाव भएपछि २ महिनाको तलब खुवाएका हौं । ‘स्वास्थ्य मन्त्रालयले तलब पठाएको छैन, हामीले तलब खुवाउन सक्ने अवस्थामा छैनौं’, ढकालले भने ।
डाक्टरको तलब मात्र हैन विमाको पैसा समेत साउनदेखि भुक्तानी नहुदा अस्पतालमा समस्या सृजना भएको ढकालले जानकारी दिएका छन । यस्तै अस्पतालमा सरकारले दिने निःशुल्क औषधि समेत चालु आर्थिक वर्षमा आएको छैन ।
