सिन्धुली । चौथो सहिद ऋषिराज देवकोटा (आजाद) स्मृति फुटवल कमलामाई नगरपालिका ९ भिमानमा जारी छ । खेलको चौथो दिन न्यु नव क्षितिज युवा क्लब बसन्तपुर सिन्धुली र श्री रत्न ज्योति युवा क्लब मिथिला ४ धनुषाबीच खेल सम्पन्न भएको छ ।
इनारपानी युवा क्लब इनारपानी सिन्धुलीको आयोजनामा भएको प्रतियोगिताको शनिबारको खेलमा न्यु नव क्षितिज युवा क्लब सिन्धुली विजयी भएको छ । न्यु नव क्षितिज युवा क्लबले ३ गोल प्राप्त गरेको छ भने श्री रत्न ज्योति युवा क्लबले शुन्य गोलमा चित्त बुझाएको छ ।
खेल अवधि भर राम्रो खेल प्रदर्शन गरेका न्यु नव क्षितिज युवा क्लबका राकेश चौधरी म्यान अफ द म्याच घोषित भएका छन । उनले खेल अविधिभर एक गोल गरे भने टिमलाई विजय बनाउन उल्लेख्य प्रदर्शन गरे ।
चौधरीलाई खेल सकिएपछि मेडल सहित सम्मान गरिएको छ । कनपा ८ का वडा अध्यक्ष कोमल श्रेष्ठ र इनारपानी युवा क्लबका अध्यक्ष जीवन चौहानले संयुक्त रुपमा मेडल प्रदान गरेका छन । यस्तै खेलमा सहभागिता जनाएर पराजित भएको श्री रत्न ज्योति युवा क्लब मिथिला ४ धनुषालाई मायाको चिनो प्रदान गरेको छ ।
प्रतियोगितामा आईतबार न्यु कमलामाई युवा मञ्च कनपा ८ करकरे र श्री जनसंगम युवा क्लब चन्दनपुर सिन्धुलीबीच प्रतिस्पर्धा हुने छ ।
नकआउट चरणमा खेलिएको खेलमा विजेता क्लबहरु क्वाटर फाईनल खेलमा प्रतिस्पर्धा गर्नेछन । शनिबारको विजेता टिम न्यु नव क्षितित युवा क्लबले शुक्रबारको विजेता टिम ब्याङखाडी युवा क्लब महोत्तरीसँग कार्तिक २१ गते प्रतिस्पर्धा गर्नेछ ।
प्रतिस्पर्धामा १६ टिमको सहभागिता रहेको छ । खेल कार्तिक २५ गतेसम्म चल्ने छ । खेलका लागि कमलामाई नगरपालिकाको आर्थिक सहयोग रहेको छ ।
