सिन्धुली । जिल्ला प्रशासन कार्यालय सिन्धुलीले उद्योगी व्यवसायीलाई जिल्लामा चिनीको कृत्रिम अभाव सृजना गरेमा कारवाहि गर्ने चेतावनी दिएको छ । प्रमुख जिल्ला अधिकारी सुनिता नेपालले सूचना जारी गर्दै उद्योगी व्यवसायीलाई चिनी स्टक राखी कृतिम अभाव सृजना नगर्न, कालोबजारी नगर्न आग्रह गरेकी हुन ।
जारी सूचनामा चिनीको आयात, बजारमा आपूर्तिका अवस्था र मुल्य एवम् उपभोक्ताले सहज रुपमा चिनी प्राप्त गर्न सकिने अवस्था हुदा हुदै कसैले अस्वभाविक, अनावश्यक र अमिल्दो रुपमा चिनीको बुकिङ गरेको देखाई चिनी स्टकमा राखी बजारमा कृतिम अभाव सृजना गर्ने, कालो बजारी गर्ने वा अन्य जुनसुकै उद्देश्यबाट अभाव सृजना हुने गरि चिनीको जम्मा खोरी नगर्न नगराउन अनुरोध गरिएको छ । सोहि सूचनामा कालोबजारी गर्ने र कृतिम अभाव सृजना गर्नेलाई हदैसम्मको कारवाहि गर्ने उल्लेख गरिएको छ ।
यसैगरि प्रहरीले चिनीको कृत्रिम अभाव सिर्जना गरेको पाइएमा प्रहरीको निःशुल्क हटलाइन १०० मा सम्पर्क गर्न आग्रह गरेको छ । प्रहरीले बिहीबार एक सूचनामार्फत चिनीको कालोबजारी, जम्माखोरी वा कृत्रिम अभाव सिर्जना गरेको पाइएमा त्यसको सूचना हेलो सरकार, प्रहरीको निःशुल्क हटलाइन १०० वा नेपाल प्रहरीको आधिकारिक सामाजिक सञ्जालमा जानकारी दिन आग्रह गरेको हो ।
यस्तै प्रहरीले चिनीको अभाव हुन नदिन प्रहरीको सम्पूर्ण इकाइहरुलाई सक्रिय परिचालन गरेको छ । तिहारको मुखमा बजारमा कृत्रिम अभाव सृजना गरी चिनीको अभाव भएको जनगुनासो आएपछि प्रहरी र प्रशासनले सूचना जारी गरेको र सक्रियता बढाएको जनाएको छ ।
