सिन्धुली । राजनीतिक हिसावले कमलामाई नगरपालिकाको मिनी चुनावका रुपमा हेरिएको सिद्धेश्वर खानेपानी तथा सरसफाई उपभोक्ता संस्थाको अध्यक्षमा नेकपा एमालेका घनश्याम देवकोटा विजयी भएका छन । शनिबार भएको निर्वाचनको अन्तिम मत परिणाम सोमबार सार्वजनिक गरिएको छ ।
एमाले राप्रपा गठबन्धनबाट साझा उमेदवार रहेका देवकोटा बहुमत सदस्य सहित निर्वाचित भएका हुन । देवकोटाले नेपाली कांग्रेस र नेकपा (माओवादी केन्द्र) का साझा उमेदवार सुरज मिश्रलाई २८१ मत पछि पार्दै विजयी भएका हुन ।
देवकोटाले १ हजार ६२ मत ल्याए भने मिश्रले ७ सय ८१ मत प्राप्त गरेका छन । यस्तै स्वतन्त्र उमेदवार लोक विक्रम थापाले ४ सय १ मत प्राप्त गरेका छन ।
दुई साझा गठबन्धनसहित स्वतन्त्र प्यानलको प्रतिस्पर्धा भएको निर्वाचनमा अध्यक्ष १, खुला सदस्य ५ र महिला सदस्य ३ गरि ९ जनाको कार्य समिति निर्वाचन मार्फत चयन भएको छ ।
यस्तै खुला सदस्यमा नेकपा एमाले र राप्रपाको संयुक्त प्यानलबाट दशरथ कुमार थापा, कपिल कुमार श्रेष्ठ र इन्द्र बहादुर भुजेल निर्वाचित भएका छन भने स्वतन्त्रबाट विज्ञान ढकाल, नेपाली कांग्रेस माओवादीको संयुक्त प्यानलबाट लवदेव जोशी निर्वाचित भएका छन ।
थापाले ९४८, श्रेष्ठले ९०४, भुजेलले ८९४ मत प्राप्त गरेका छन । यस्तै ढकालले ७३२ र जोशीले ७२५ मत प्राप्त गरेका छन । पाँच जना निर्वाचित हुने खुला सदस्यमा १६ जनाको उमेदवारी रहेको थियो । यस्तै महिला सदस्यमा नेकपा एमाले र राप्रपाको तर्फबाट शारदा ढकाल र सुमना थापा विजयी भएका छन भने कांग्रेस माओवादीको प्यानलबाट चन्द्रकला खड्का निर्वाचित भएकी छिन । महिला सदस्यमा ६ जनाको प्रतिस्पर्धा रहेको थियो ।
कमलामाई नगरपालिका वडा नं. ४, ५, ६ र ७ का २ हजार ८ सय ९३ जना मतदाता रहेका थिए । जसमा २ हजार ३ सय ४२ मत खसेको थियो । संस्थामा तीन हजार ४ सय २६ सदस्य रहेकोमा तीन महिनाभन्दा बढी समयको खानेपानी महसुल नबुझाएका ५ सय ३३ उपभोक्ताले मतदानको अधिकार पाएका थिएनन । संस्थाले तीन महिनाभन्दा बढी बक्यौता रकम तिर्न बाँकी रहेका व्यक्तिलाई चुन्ने चुनिने अधिकार नदिने निर्णय गरेको थियो ।
