सिन्धुली । फिक्कल गाउँपालिका वडा नं. ३ को खुरहरीमा एमालेका गाउपालिका अध्यक्षका उमेदवार पार्वती सुनुवार सहितको टोलीमाथि नेपाली कांग्रेसका कार्यकर्ताले आक्रमण गरेका छन । विहिबार खुरहरीमा पार्टीको आन्तरिक बैठक बसिरहेका एमाले उमेदवार पार्वती सुनुवारको टोलीमाथि नेपाली कांग्रेसका कार्यकर्ताले आक्रमण गरेका हुन ।
कांग्रेस कार्यकर्ताको आक्रमणबाट अध्यक्षका उमेदवार पार्वती सुनुवार सहित १५ जना भन्दा बढी घाईते भएका छन । एमालेका टोली छलफलमा बसिरहेको घरमा पुगेर आफुहरुमाथि आक्रमण गरिएको अध्यक्ष पदका उमेदवार सुनुवारले बताएकी छिन । उनले भनिन्, ‘हामीमाथि आक्रमण भईरह्यो, प्रतिकार गरेनौं ।’
आक्रमणबाट सुजन खड्का, सुवास खड्का, सन्तोष खड्का, अमर खड्का, राम बहादुर वि.क लगाएतका कार्यकर्ता घाईते भएको नेकपा एमालेका बाग्मति प्रदेश सदस्य प्रदीप कटुवालले जानकारी दिएका छन ।
उनका अनुसार घाईते मध्ये ८ जनाको अवस्था गम्भिर रहेको छ । एमाले उमेदवार सुनुवार चढ्ने गाडी सहित युवाहरुले प्रयोग गर्ने ३० भन्दा बढी मोटरसाईकल, ३ वटा गाडीमा कांग्रेस कार्यकर्ताले तोडफोड गरेका छन । सबै सवारी साधनमा पूर्ण क्षति पुगेको छ ।
एमालेका उमेदवार सुनुवार सहित कार्यकर्ता बसेको घर हरिबहादुर खड्का र डोर बहादुर खड्काको घरमा समेत पूर्ण क्षति पु¥याएका छन् । कांग्रेस कार्यकर्ताले एमालेका बाग्मति प्रदेश कमिटी सदस्य प्रदीप कटुवालमाथि समेत आक्रमण गरेका भए पनि उनको अवस्था भने सामान्य रहेको छ । यस्तै एमालेका ४ जना कार्यकर्ता सम्पर्कमा नआएको समेत कटुवालले बताएका छन ।
यस्तै जिल्ला प्रहरी कार्यालय सिन्धुलीले घटना भएको जानकारी आएको तर के कति क्षति भएको भन्ने बारे पुरा विवरण आउन नसकेको जनाएको छ । जिल्ला प्रहरी कार्यालय सिन्धुलीका डिएसपी मनोज कुमार लामाले सञ्चार सम्पर्कमा समस्या भएका कारण पुरा विवरण आउन नसकेको बताए ।
यसैबीच नेकपा एमालेका नेताहरुले मावि खुरहरिमा शुक्रबार मतदान हुन नसक्ने बताएका छन । तथापी निर्वाचन अधिृकत डिकबहादुर कार्कीले घटना स्थलमा थप सुरक्षा खटाईएको बताएका छन । सिन्धुलीबाट समेत थप सुरक्षाकर्मी परिचालन गरिएको उनले बताए । उनका अनुसार शुक्रबार मतदान गर्नका लागि दुवै पक्षसँग समन्वय गरिएको र सकेसम्म मतदान गराउन प्रयास गरिने बताएका छन ।
यसैबीच फिक्कलमा भएको घटनापछि थप गरिएको सुरक्षाले घटनालाई साम्य पार्न १ राउन्ड हवाई फायर गर्नुका ३ सेल अश्रुग्याँस प्रहार गरिएको छ । सिन्धुलीबाट गएको टोली घटनास्थल पुगि सकेको प्रहरीले जनाएको छ ।
सुनकोशीमा पनि झडप
यस्तै सुनकोशी गाउँपालिका वडा नं. ५ मा पनि एमाले उमेदवारमाथि आक्रमण भएको छ । एमालेका महिला वडा सदस्यका उमेदवार जानकी सुनुवार सहित पाँच जना घाईते भएका हुन । घाईते हुनेमा तुलसीराम दाहाल, बिनोद दाहाल, भरत खड्का सहितका कार्यकर्ता घाईते भएका हुन ।
हिडिरहेका उनीहरुमाथि बाटो ढुकेर बसिरहेका दुर्गा सुनुवार सहितका २५ जना माओवादी कार्यकर्ताले आक्रमण गरेका हुन ।
