सिन्धुली । सिन्धुलीका १६ जनाले शुक्रबार कोभिड १९ जितेर घर फर्केका छन । उनीहरुलाई सिन्धुली अस्पताल र एपोलो अस्पतालमा उपचार गरिएको थियो । सिन्धुली अस्पतालले दुवै अस्पतालमा तयार गरिएका आइसोलेसनमा रहेका विरामीको उपचार गरिरहेको छ ।
सिन्धुली अस्पतालले दुवै स्थानमा गरेको उपचारका क्रममा रिपोर्ट नेगेटिभ आएपछि उनीहरुलाई डिस्चार्ज गरिएको हो ।
एक महिला र १५ जना पुरुष उपचारपछि निको भएर घर फर्केका हुन । सिन्धुली अस्पतालका कर्मचारी उषा सुनुवार सहित १६ जना र स्वास्थ्यकर्मी सहित २५ जनाको कोरोना परिक्षण गरिएको थियो ।
सिन्धुली अस्पतालमा उपचाररत १ जना र एपोलो अस्पतालमा उपचाररत १५ जना डिस्चार्ज भएको सिन्धुली अस्पतालले जनाएको छ ।
उपचारमा संलग्न स्वास्थ्यकर्मीको समेत रिपोर्ट नेगेटिभ आएको सिन्धुली अस्पतालका व्यवस्थापक विमल श्रेष्ठले बताए । उनका अनुसार डिस्चार्ज भएका व्यक्तिहरुलाई सिन्धुली अस्पताल विकास समितिका अध्यक्ष प्रलाद पोखरेल र स्वास्थ्यकर्मीहरुले विदाई गरेका थिए ।
यसरी संक्रमण जित्नेमा ७७ वर्षका जेष्ठ नागरिक समेत रहेका छन । कोभिड १९ संक्रमण देखिए पछि काठमान्डौमा उपचार नपाई सिन्धुली आएका तिनपाटन गाउँपालिका वडा नं. ९ का ७७ वर्षिय तिलक बहादुर कार्कीले समेत कोरोना जितेका छन । उनी मृगौला रोगी हुन । काठमान्डौमा उपचारका लागि गएका उनमा कोरोना संक्रमण देखिएको र वेड नपाएपछि घरमै ल्याईएको थियो । सिन्धुलीमा उपचार गरिएको थियो ।
४७ जना कोरोना संक्रमित रहेको सिन्धुलीबाट २८ जनाले हालसम्म निको भएर घर फर्केका छन । ६ जना होम आईसोलेसनमा बसेका छन । सिन्धुली अस्पतालमा २ जना, एपोलो अस्पतालमा ७ जना उपचाररत रहेको श्रेष्ठले जानकारी दिएका छन ।
