सिन्धुली । नेकपाका स्थायी कमिटी सदस्य हरिबोल गजुरेलले राम्रो काम गरेपछि मात्र नेता बनिने बताएका छन । नेकपा कमलामाई नगर कमिटीले आइतबार आयोजना गरेको आउदै गरेको नेपालीहरुको चाडपर्वहरुको शुभकामना आदानप्रदान कार्यक्रममा बोल्दै उनले यस्तो बताएका हुन । उनले नेकपाका नेता तथा कार्यकर्ताहरुलाई जनता खुशी हुने काम गर्न अनुरोध गर्दै भने, राम्रो गरे पो नेता बनिन्छ गाली गरेर नेता बनिन्न ।’
‘कार्यकर्ता जनता खुशी पार्नु प¥यो गलत काम गरेमा कार्यकर्ता मान्दैनन जनताले मान्दैनन– उनले भने । नेताले राम्रो काम गर्नेको समर्थन गर्नुपर्ने र नराम्रो गर्नेलाई सुधार गर्नुपर्ने बताउँदै गजुरेलले भने–‘राम्रो काम जले गरे पनि समर्थन गर्नुपर्छ चाहे त्यो कांग्रेसले गरोस चाहे त्यो राप्रपाले गरोस चाहे अरु पार्टीले गरोस ।’ उनले थपे, ‘त्यो त हाम्रो काम हो जस्ले गरेपनि समर्थन गर्नुपर्छ ।’ नेकपाका नेता कार्यकर्तालाई सुध्रिन आग्रह गर्दै गजुरेलले ‘आफुलाई सुधार्न धेरै गाह्रो छ, सुधार्ने प्रयास गरौं ।’
संघिय सांसद समेत रहेका गजुरेलले मनमोहन अधिकारीको नौ महिने सरकारपछि सबैभन्दा बढी काम गरेको अहिलेको सरकार भएको दावी गरे । उनले भने ‘मनमोहनको सरकार छोडेर यो सरकारले काम गरेको छ ।’
जनताले सरकारसँग धेरै ठूलो कुरा नखोजेको बताउँदै जनतामा आशा पलाउने काम गर्न कार्यकर्तालाई आग्रह समेत गरे । उनले कम्युनिष्टहरु अनुशासित हुनुपर्ने बताए । माथिबाट धमिलो पानी आएसम्म तल संलो पानी खोजेर नपाउने भन्दै गजुरेलले शिर्ष नेता नै सच्चिनुपर्नेमा जोड दिए ।
उनले सबै धर्म, संस्कृति र समुदायलाई लक्षित गरेर पार्टीले कार्यक्रम गर्नुपर्ने र सबै धर्म संस्कृतिलाई बराबर व्यवहार गर्न पनि कार्यकर्तालाई आग्रह गरेका छन । उनले कम्युनिष्ट पार्टीमा वेथिति बढ्दै गएको बताउँदै छलफल, बैठक गरेर वेथिति कम गर्नुपर्ने आवश्यकता औंल्याए । उनले पार्टी कार्यकर्तामा गुटबन्दी र अराजकता हावी हुनु नेताहरुकै कमजोरी रहेको भन्दै सच्याउन आवश्यक रहेको बताए ।
कार्यक्रममा बोल्दै नेकपाका केन्द्रीय सदस्य एवम् नेकपा सिन्धुलीका इन्चार्ज विषमलाल अधिकारी दनुवारले तीनै तहका सरकारले योजना बनाउँदा पार्टी र सरकारको तालमेल नमिलेको बताए । उनले पार्टी भित्रको अनुशासन जिम्मेवार शिर्ष नेताहरुले नै नमानी प्रतिस्पर्धा गरेकाले समस्या सृजना भएको बताए ।
कार्यक्रममा बोल्ने अधिकांश नेताले पार्टी भित्र विचलन आउन थालेको, पार्टीका नेता तथा कार्यकर्ता पंक्तिमा कसैले कसैको अस्थित्व स्वीकार गर्न नसकेको, सरकारको रक्षामा पार्टीले ध्यान नदिएको लगाएतका विषयमा बहस गरेका थिए । उनीहरुले स्पष्ट दृष्टिकोण सहित सरकारलाई सहयोग गर्नुपर्नेमा जोड दिएका थिए भने पार्टीको आचरण र अनुशासनमा सुदृढिकरण आवश्यक रहेको बताए ।
नगर कमिटी अध्यक्ष चुरामणी श्रेष्ठको अध्यक्षतामा भएको कार्यक्रममा नेकपाका सहइन्चार्जद्वय उमादेवी कोइराला, कमलजंग राई, केन्द्रीय सल्लाहकार कमिटीका सदस्य केशवप्रसाद देवकोटा, केन्द्रीय सदस्य तथा जिल्ला अध्यक्ष राजन दाहाल, प्रदेश कमिटी सदस्यद्वय खड्ग खत्री, बुद्धिमान माझी, जिल्ला सचिव प्रदीप कटुवाल, प्रदेश नं. ३ का सांसद विनोद कुमार खड्का, जिल्ला कमिटि सदस्यहरु प्रलाद कुमार पोखरेल, सूर्य पाख्रिन, महेन्द्रदेव श्रेष्ठ, मञ्जु देवकोटा, रश्मिला देवकोटा, सविता कोइराला, पेशाकर्मीको तर्फबाट टोमप्रसाद काफ्ले लगाएतले मन्तव्य व्यक्त गरेका थिए ।
