सिन्धुली । बालविवाह न्युनिकरण गर्न जिल्लाका तीन गाउँपालिका प्रतिवद्ध भएका छन । गोलञ्जोर, फिक्कल र तीनपाटन गाउँपालिका उक्त अभियानलाई नीति निर्माण गरि कार्यान्वयनमा जाने प्रतिवद्धता जनाएका हुन ।
सोमबार र मंगलबार सिन्धुलीमाढीमा भएको विपदमा बालबालिकाहरुको संरक्षणका लागि आकस्मिक निर्देशिका र बालविवाह न्युनिकरण रणनीतिक योजना मस्यौदा सम्बन्धि कार्यशालापछि उनीहरु कार्यान्वयनका लागि प्रतिवद्ध भएका हुन ।
ती गाउँपालिकाका अध्यक्ष, उपाध्यक्ष, प्रमुख प्रशासकीय अधिकृतहरु, वडाध्यक्षहरु, कर्मचारीहरु, स्थानीय बालक्लब तथा अन्य संस्थाहरु सहभागि रहेको उक्त कार्यशालामा असोज भित्र नीति तथा कार्ययोजनाहरु पास गरि कार्यान्वयनमा जाने प्रतिवद्धता व्यक्त गरेका हुन ।
उनीहरुले भदौ ३० गते भित्र विपदमा बालबालिकाहरुको संरक्षणका लागि आकस्मिक निर्देशिका र बालविवाह अन्त्यका लागि रणनीतिक योजना बनाईसक्ने गरि मिति तय गरेका छन । यस्तै अन्तिम छलफल र कार्यपालिकाबाट अनुमोदन गर्ने समय पनि गाउँपालिकाहरुले तय गरिसकेका छन ।
गोलञ्जोर गाउँपालिकाले अनुमोदनका लागि असोज ९ गतेको मिति तय गरेको छ । यस्तै फिक्कल गाउँपालिकाले असोज ३ गते र तिनपाटन गाउँपालिकाले असोज १० गते कार्यपालिकाबाट अनुमोदन गर्ने प्रतिवद्धता जनाएको छ ।
तीनवटै गाउँपालिकाको बालविवाह अन्त्यका लागि रणनीतिक योजना निर्माणका लागि सहयोग गर्न नवराज थापालाई जिम्मा दिईएको छ भने विपदमा बालबालिकाहरुको संरक्षणका लागि आकस्मिक निर्देशिका तयारका लागि उद्धवराज अवस्थीलाई कन्सल्टेन्टका रुपमा जिम्मेवारी दिईएको छ । कार्यशालाको आयोजना सामुदायिक विकास कार्यक्रम सिन्धुलीले गरेको थियो ।
