सिन्धुली । किशोरी र बालिकाहरुको ‘शक्ति, प्रतिनिधित्व र स्वतन्त्रता’लाई कलामा खोज्नका लागि सिन्धुलीको भिमानमा ‘आर्ट इज पावर’ नामक कार्यशाला सुरु भएको छ । प्लान इन्टरनेशनल नेपालको सहयोग तथा सिद्धार्थ आर्ट फाउन्डेसनको आयोजनामा शनिबारदेखि ३ दिने कार्यशाला सुरु भएको हो । ३ दिने कार्यशालापछि चौथो दिन अर्थात भदौ १० गते बालिकाहरुले तयार गरेको कलालाई प्रदर्शनी गरिने छ ।
विभिन्न विधात्मक कलाबाट बालिकाको शक्तिलाई उजागर गरि समाजमा रुपान्तरण ल्याउनका लागि कला कार्यशाला सुरु गरिएको प्लान नेपाल सिन्धुलीका प्रमुख राम बहादुर श्रेष्ठले बताए ।
कार्यशालामा ५२ जना बालिकाहरुको सहभागिता रहेको छ । ११ वर्षदेखि १८ वर्ष उमेर समूहका कमलामाई नगरपालिकाका ४ वटा वडाका बालिकालाई कार्यशालामा सहभागि गराईएको छ । ३ वटा विद्यालय र एक समुदायका बालिकाहरु उक्त कार्यशालामा सहभागि छन । यो कार्याशालामा किशोरीहरुले कलाको माध्यमबाट आफ्नो आवाज उठाउन सक्ने छन र किशोरीका मुद्दाबारे अवगत गराउन सक्ने आयोजकको अपेक्षा छ ।
कार्यशालामा चित्रकला, संगित र साहित्यबाट किशोरी र बालिकाको आवाज बाहिर ल्याउन सिप सिकाईने छ । सहभागिको रुचि र उनीहरुको सृजना परिवर्तनका लागि हुने सिद्धार्थ आर्ट फाउन्डेसनका प्रशिक्षक प्रतिमा थकालीले बताईन । उक्त शिविरमा कक्षा ६ देखि ८ सम्म पढ्ने बालिका र ९, १० र ११ मा पढ्ने बालिका छुट्टा छुट्टै समूह बनाई सहजीकरण गरिएको छ ।
सिद्धार्थ आर्ट फाउन्डेशनका प्रतिमा थकाली र अग्रणी झाले चित्रकला, किशन श्रेष्ठले संगित र शुभांगी खड्काले साहित्यमा कला खोज्न सहभागिलाई प्रशिक्षित गर्ने छन । कार्यशालाको सुभारम्भ कमलामाई नगरपालिकाका कार्यवाहक मेयर मञ्जु देवकोटाले गरेकी छिन । अन्तराष्ट्रिय अक्टोबर १० लाई लक्षित गरि यो कार्यशाला गरिएको प्लान नेपालका श्रेष्ठले बताए । उनका अनुसार यो कार्यशाला सुनसरी, मकवानपुर, सिन्धुली, बाँके, वर्दिया र जुम्लामा गरिदै छ । ती जिल्लाबाट उत्कृष्ट आर्ट गर्ने बालिकालाई राष्ट्रिय स्तरको कार्यशालामा सहभागि बनाईने छ ।
