सिन्धुली । कमलामाई नगरपालिका सिन्धुलीले आर्थिक वर्ष २०७५/०७६ को बार्षिक प्रगति प्रतिवेदन सार्वजनिक गरेको छ । सिन्धुलीमाढीमा सोमबार बार्षिक प्रगतिको समिक्षा कार्यक्रमको आयोजना गरि नगरपालिकाले उपलब्धि सार्वजनिक गरेको हो ।
नगरपालिकाको प्रगति सार्वजनिक गर्दै प्रमुख प्रशासकीय अधिकृत पुरुषोत्तम सुवेदीले एक वर्षमा नगरपालिकाले ४३७ वटा विकास निर्माणका योजना सम्पन्न भएको बताए । जसमा २११ वटा सडक निर्माणका योजना सम्पन्न गरेको नगरपालिकाले जनाएको छ । सडक निर्माणमा एक वर्षमा नगरपालिकाले १८ करोड ९३ लाख ७२ हजार खर्च गरेको जनाएको छ ।
यस्तै नगरपालिकाले खानेपानीका ७२ वटा योजनामा काम गरेको छ जसमा १ करोड ८६ लाख १० हजार ५२३ रुपैंया खर्च भएको जनाएको छ । यस्तै सिंचाईमा ३८ योजना सम्पन्न भएको प्रगतिमा देखिएको छ भने ८२ वटा सार्वजनिक भवन निर्माण, शिक्षाका २३ वटा योजना सम्पन्न भएको नगरपालिकाले जनाएको छ । त्यस्तै वातावरणतर्फ ३, प्रकोपतर्फ १५ योजना, विद्युत तर्फ ३ वटा योजना सम्पन्न भएको नगरपालिकाले जनाएको छ ।
कमलामाई नगरपालिकाका मेयर खड्ग खत्रीको अध्यक्षता तथा प्रदेश नं. ३ का सांसद विनोद खड्काको प्रमुख आतिथ्यतामा भएको कार्यक्रममा नगरपालिकाले उपभोक्ता समितिमार्फत ३८९, वोलपत्र मार्फत ११, शिलवन्दी दरभाउपत्र मार्फत ६, दरभाउपत्र मार्फत २६ र अमानत मार्फत ५ वटा योजना सम्पन्न भएको जनाएको छ ।
यस्ता छन नगरका एक वर्षे उपलब्धि
नगरपालिकाले एक वर्षका उत्कृष्ट उपलब्धि समेत सार्वजनिक गरेको छ । नगरले ऐतिहासिक सिन्धुलीगढीको गुरुयोजना तयार भएको, एकीकृत शहरी विकास योजना तयार भएको, ३५ वटा कार्यविधि तथा अन्य कानुन बनेको लगाएतका उल्लेख्य काम भनि उल्लेख गरेको छ । सुवेदीको प्रतिवेदनमा ३ वटा एम्बुलेन्स खरिद गरि रेडक्रसलाई हस्तान्तरण गरिएको, बैकल्पिक राजमार्गका रुपमा पेट्रोलपम्पदेखि चिसान्त भञ्ज्याङ गोलञ्जोर र माइस्थानदेखि इश्वरपुर सर्लाही सडक निर्माण सुरु गरिएको, कृषि उत्पादनलाई व्यवस्थित गर्न कृषि सम्बन्धि सफ्टवेयर तयार गरिएको, नगरपालिकालाई सञ्चारमा पहुँच पु¥याउन वेवसाईड, फेसवुक पेज, द्वीटर, मोवाईल एप्स र युटुव निर्माण गरिएको लगाएतका काम नगरपालिकाले उपलब्धिका रुपमा लिएको छ ।
त्यसैगरि मुख्य बजारमा सोलार र सिसीटिभि जडान, सबै वडामा विद्युतीकरणका लागि सामाना खरिद लगाएतका काम नगरका उल्लेखनीय काममा दर्ज भएका छन ।
यस्तै च्याउमा नगरपालिका आत्मनिर्भर भएको, जिउँदो कुखुरा र अन्य पशुको मासु बाहिर निर्यात भएको, हिउँदे घाँसको विउ नगर बाहिर विक्री वितरण गरिएको, पशु सुत्केरी भत्ता कार्यक्रम नमुना बनेको, नगरपालिकालाई पूर्ण खोपयुक्त नगर घोषणा गरिएको, १४ वटै वडामा माटो शिविर तथा न्याय सम्पादन सम्बन्धि तालिम दिईएको लगाएतलाई नगरपालिकाले मुख्य उपलब्धिका रुपमा सार्वजनिक गरेको छ ।
नगरपालिकाले शिक्षा, स्वास्थ्य, कृषि, पशुविकास, लक्षित समूहका कार्यक्रम लगाएतको प्रगति उल्लेख्य भएको जनाएको छ । कमलामाई नगरपालिकाका मेयर खड्ग खत्रीले एक वर्षमा नगरपालिकाले उल्लेख्य उपलब्धि हासिल गरेको बताए । आगामी वर्षमा जनताले गुनासो नगर्ने गरि काम गर्ने समेत बताए ।
