सिन्धुली । पानी पर्न कम भएपछि शनिबारदेखि राहत वितरणको काम सुरु गरिएको छ । असारको अन्तिम साता परेको अविरल वर्षाको कारण विस्थापित भएका तथा विस्थापित भएकाहरुका लागि राहत वितरण गर्न सुरु गरिएको हो ।
जिल्ला विपत व्यवस्थापन समितिसँगको समन्वयमा नेपाल रेडक्रम सोसाईटी सिन्धुलीले वाढीका कारण ज्यान गुमाएका र त्यसवाट प्रभावित भएका दुधौली नगरपालिका वडा नं. ४ र ५ का पीडितलाई राहतको गैह्र खाद्य प्याकेज वितरण गरेको छ ।
दुधौली नगरपालिकाको डकाहामा पीडितलाई राहत सामग्री वितरण गरिएको हो । दुधौली नगरपालिकाका प्रमुख घनश्याम राउतको अध्यक्षता र सिन्धुली क्षेत्र नं. १ का सासद गणेश कुमार पहाडीको प्रमुख आतिथ्यतामा भएको कार्यक्रममा पूर्ण क्षति भएका १५ परिवार र आंशिक क्षति भएका ३३ परिवारलाई राहत वितरण गरिएको हो ।
नेपाल रेडक्रस सोसाईटी सिन्धुलीका सभापति अशोक श्रेष्ठले १५ परिवारका लागि कपडा, भाडाकुडा लगायतको ५ जनाको परिवारको लागि पुग्ने गरी सामान रहेको प्याकेज उपलब्ध गराएको बताए । त्यस्तै अन्य ३३ परिवारलाई भने त्रिपाल वितरण गरिएको छ ।
रेडक्रस सिन्धुलीका अनुसार जिल्लामा २२० घर परिवार विस्थापित भएको पाईएको छ । यस्तै बाढी पहिरोका कारण ६ जनाले ज्यान गुमाएका छन भने ३ जना अझै वेपत्ता छन ।
