सिन्धुली । प्राकृतिक विपत्तीका बेलामा राहत तथा उद्धारका लागि चाहिने अत्यावश्यक राहतका सामग्रीको समेत जिल्लामा अभाव छ भने पहिरो, भुक्षय र नदी नियन्त्रण गरि जोखिममा परेका वस्तीको उद्धारका लागि आवश्यक पर्ने तारजालीको समेत जिल्लामा अभाव भएको छ ।
नेपाल रेडक्रस सोसाईटी सिन्धुलीले संकलन गरेको वर्षाका कारण आएको बाढी पहिरोबाट भएको क्षतिको प्रारम्भिक तथ्यांक अनुसार २ सय परिवार विस्थापित भएका छन । अझै तथ्यांक आउन बाँकी रहेको रेडक्रस सिन्धुलीका सभापति अशोक श्रेष्ठले बताए । उनका अनुसार रेडक्रस सिन्धुली शाखामा एकसय परिवारलाई पुग्ने गैरखाद्य सामग्री मात्र उपलब्ध छ । राहत सामग्रीको अभाव भएपछि विपद व्यवस्थापन समितिले केन्द्रीय रेडक्रसमा अनुरोध गर्ने निर्णय गरेको छ । खाद्यान्न लगाएतका सामग्रीको संचय जिल्लामा छैन ।
यस्तै जिल्लामा ३७० थान तारजाली मात्र रहेको जिल्ला विपद व्यवस्थापन समिति सिन्धुलीका अध्यक्ष एवम् प्रमुख जिल्ला अधिकारी जनार्दन गौतमले बताए । उनका अनुसार विपद व्यवस्थापन समितिको बुधबार बसेको बैठकले केन्द्रीय विपद व्यवस्थापन समिति मार्फत केन्द्रीय सरकार र प्रदेश सरकारलाई एक हजार तारजाली माग गर्ने निर्णय गरेको छ ।
विपद व्यवस्थापन समितिमा आर्थिक अभाव समेत देखिएको छ । हाल उक्त समितिमा १० लाख २२ हजार ७१२ रुपैंया मात्र पैसा छ । ‘त्यो पैसा मृतक र विस्थापितलाई राहत दिदै सकिन्छ’ गौतमले भने । बाँकी आर्थिक स्रोत समेत नभएको उनले बताए ।
विपद पूर्व तयारी नभएका कारण विस्थापितलाई बस्ने व्यवस्था, खाद्यान्न तथा राहतका सामग्री समेत पुग्न सकेको छैन । विपद व्यवस्थापन समितिको बैठक नै अविरल वर्षापछि पहिलो पटक बुधबार बसेको छ । बैठकले बाढी र पहिरोका कारण मृत्यु भएका परिवारका आफन्तलाई १ लाख राहत उपलब्ध गराउने, घर पूर्ण रुपमा क्षती भएका २ सय परिवारलाई १० हजारका दरले आर्थिक सहयोग दिने लगाएतका निर्णय गरेको छ । भने वेपत्ता रहेका ३ जनाको खोजी कार्य समेत जारी राख्ने निर्णय गरेको छ । यस्तै समितिको तथ्यांक अनुसार ५ जनाको मृत्यु भईसकेको छ ।
यस्तै तथ्यांकलाई एकीकृत गर्नका लागि स्थानीय सरकार, स्थानीय विपद व्यवस्थापन समिति, रेडक्रस र नेपाल प्रहरीले संयुक्त रुपमा तथ्यांक संकलन गर्ने निर्णय समेत बैठकले गरेको छ । यस्तै विपद व्यवस्थापन समितिको बैठकले सिन्धुली हुदै सञ्चालनमा रहेका विपी राजमार्ग, मध्यपहाडी राजमार्ग र मदन भण्डारी राजमार्ग सुचारु गर्न सम्बन्धित सडकका आयोजनाहरुलाई निर्देशन दिने, जिल्ला भित्र सञ्चालित सडकहरु सुचारु गर्न संघिय सरकार, प्रदेश सरकार र स्थानीय सरकारहरुसँग अनुरोध गर्ने निर्णय समेत गरेको छ । सिन्धुलीमा विपी राजमार्ग आंशिक रुपमा खुला भए पनि अन्य सडक खुल्न सकेका छैनन ।
बाढी पहिरोका कारण पोलहरु ढलेर विद्युत अवरुद्ध भएको भन्दै विपद व्यवस्थापन समितिले तत्काल विद्युत सेवा सञ्चालनमा ल्याउन नेपाल विद्युत प्राधिकरण जिल्ला शाखालाई अनुरोध गर्ने निर्णय समेत गरेको छ । जिल्लामा केहि दिनदेखि कमलामाई नगरपालिकाका बजार क्षेत्र बाहेक विद्युत अवरुद्ध भएको छ । प्राधिकरणका अनुसार बाढी र पहिरोका कारण २ सय पोलमा क्षती पुगेको छ भने करीब १ करोड २० लाख बराबरको नोक्सानी प्राधिकरणले व्यहोरेको छ ।
बैठकमा प्रदेशसभा सदस्य राजन दाहालले २०७२ सालको भुकम्पपछि पहिलोपटक अलि लामो वर्षा हुदा जताततै पहिरो र बाढीले क्षती पु¥याएको बताए । उनले विना योजना र वातावरणीय परिक्षण विना खनिएका सडकका कारण महाभारत क्षेत्र क्षतविक्षत भएको बताए । यस्तै अर्का प्रदेश सभा सदस्य प्रदीप कटुवालले स्थानीय सरकार र विपद व्यवस्थापनमा राहतमा एकरुपता नआएको बताए ।
