सिन्धुली । सिन्धुली जिल्लामा ६ महिनाको अवधिमा २७ मानवअधिकार उलंघनका घटना भएको पाईएको छ । अनौपचारिक क्षेत्र सेवा केन्द्र (इन्सेक) जिल्ला कार्यालय सिन्धुलीले एक प्रतिवेदन सार्वजनिक गर्दै सन् २०१९ को ६ महिनामा २७ वटा घटना भएको जनाएको छ ।
इन्सेक जिल्ला प्रतिनिधि बिमला पाण्डेले सार्वजनिक गरेको तथ्यांकमा शिशु हत्या, बालिका बलात्कार बालविवाह र बलात्कार, घरेलु हिंसा लगाएतका घटना भएको उल्लेख गरिएको छ । प्रतिवेदनमा बालिकाहरु बढी पीडित भएको जनाईएको छ । उनीहरु आफन्त, परिवार र नजिकका व्यक्तिबाट पीडित भएको र जिल्लाको मानवअधिकारको अवस्था सन्तोषजनक नरहेको उल्लेख गरिएको छ ।
जिल्लामा यस अवधिमा ११ वटा बलात्कार जन्य अपराध जसमा ८ जना बालिका पीडित भएका छन । त्यसपछि घरेलु हिंसाका ९ वटा घटना भएको उल्लेख गरिएको छ । बालविवाह, शिशुहत्या, कुटपीटका १÷१ वटा घटना भएको प्रतिवेदनमा उल्लेख छ ।
इन्सेकले मानवअधिकार उलंघनका घटनामध्ये गत वर्षको तुलनमा घरेलु हिंसाका घटनामा ५० प्रतिशत कमी आएको जनाएको छ । अन्य जघन्य खालका घटनाबाट मानवअधिकार उलंघनमा भने कुनै कमी नआएका इन्सेकले जनाएको छ । शनिबार सिन्धुलीमाढीमा आयोजित मानवअधिकार अधिकार वर्ष पुस्तक २०२० का लागि संकलित घटनाको पूर्व अर्धबार्षिक समिक्षा कार्यक्रममा उक्त कुरा उल्लेख गरिएको हो ।
कार्यक्रममा सहभागिहरुले इन्सेकले प्रहरी प्रशासन र अदालतमा दर्ता भएका घटनामात्र नभई गाउँ गाउँमा लुकेका घटनालाई अध्ययन गर्न सुझाव दिएका छन । उनीहरुले बालविवाह, बहुविवाह, बलात्कार जस्ता घटनाहरु गाउँमै मिलाउने परिपाटीको विकास भएकाले त्यस तर्फ इन्सेकले पहल कदमी लिनुपर्ने सुझाव दिएका छन । यस्तै जागरणका कार्यक्रम विद्यालय, स्कुलहरुमा लान पनि सुझाव दिएका छन ।
यस्तै बैदेशिक रोजगारमा हुने बेचविखन, उमेर नपुगी विवाह गर्ने र विवाह दर्ता जन्मदर्ताको अधिकारबाट बञ्चितहरुको विकराल रुपमा रहेकाले स्थानीय सरकारले घटनादर्तालाई ध्यान दिनुपर्ने सुझाव समेत दिएका छन ।
कार्यक्रममा प्रदेश नं. ३ का सांसद प्रदीप कटुवालले नेपालमा अन्तर्राष्ट्रिय मान्यतालाई हेरेर कानुन बनाउँदा अव्यवहारिक भएको बताए । उनले प्रदेश नं. ३ ले कानुन बनाउँदा व्यवहारीक पक्षलाई समेत ध्यान दिएर बनाउन थालेको बताए । उनले मानवअधिकारलाई मध्येनजर गरि कानुन बनिरहेका र बन्नेमा विश्वस्त हुन आग्रह समेत गरे ।
कार्यक्रममा कमलामाई नगरपालिकाका उपमेयर मञ्जु देवकोटा, नेपाली कांगे्रसका सभापति उज्जल बराल, जिल्ला प्रशासन कार्यालय सिन्धुलीका प्रशाशकीय अधिकृत हुतराज निरौला लगाएतले मन्तव्य व्यक्त गरेका थिए ।
