सिन्धुली, ५ चैत । नेपाल कम्युनिष्ट पार्टी नेकपाका केन्द्रीय सदस्य कमलजंग राईले विद्यार्थीहरुकै सक्रियताले नेपालको शासन प्रणालीमा परिवर्तन र स्थापित भएको भन्दै अवको शैक्षिक गन्तव्य व्यवहारिक शिक्षा हुनुपर्ने बताएका छन् ।
स्वतन्त्र विद्यार्थी युनियन सिद्धज्योति शिक्षा क्याम्पसको आयोजनामा भएको स्नातक तह चौथो वर्षमा अध्ययनरत विद्यार्थीहरुको विदाई तथा फागुपूर्णिमा विशेष कार्यक्रमलाई सम्बोधन गर्दै नेता राईले यस्तो बताएका हुन् । नेता राईले राष्ट्रनिर्माणको जिम्मेवारी युवा पुस्तामा रहेको बताउँदै कृषी उर्जा र पर्यटनका क्षेत्रमा अध्ययन अध्यापन अगाडी बढाई राष्ट्रलाई आर्थिक समृद्धिको दिशामा केन्द्रीत गर्नुपर्ने बताए ।
यसैगरी उनले स्वतन्त्र विद्यार्थी युनियन प्राप्तीका लागि चिनियाँ काजीजस्ता थुप्रै विद्यार्थी नेताहरुले वलिदानी गरेको स्मरण गर्दै अहिले स्ववियू निर्वाचनप्रति विश्वविद्यालय र विद्यार्थी संगठनहरुले चासो नदेखाएको प्रति दुःख व्यक्त गर्दै स्ववियू निर्वाचनको लागि पहल गर्न उनले विद्यार्थी संगठनहरुलाई आग्रह गरे । यसैगरी राईले फागुपूर्णिको शुभकामना दिँदै यो पर्वलाई भव्य र सभ्य तरिकाले मनाउन सबैलाई आग्रह समेत गरे ।
स्वतन्त्र विद्यार्थी युनियन सिद्धज्योति शिक्षा क्याम्पसका अध्यक्ष दिपेन्द्र फुयालको अध्यक्षतामा भएको कार्यक्रममा क्याम्पसका सहायक क्याम्पस प्रमुख यम पाण्डे, अनेरास्ववियू सिन्धुलीका अध्यक्ष गोकर्ण भुजेल, क्याम्पसका प्राध्यापक नानीबाबु घिमिरे, विभिन्न विद्यार्थी संगठनका नेताहरु लगायतले मन्तव्य व्यक्त गरेका थिए । कार्यक्रमको सञ्चालन स्वतन्त्र विद्यार्थी युनियनका सचिव कन्चन पहाडीले गरेका थिए भने कार्यक्रममा स्वागत मन्तव्य स्ववियू कोषध्यक्ष सम्झना भोलनले राखेकी थिइन् ।
यसैगरी विदाई कार्यक्रममा स्नातक तह तेस्रो वर्षमा अध्ययरत विद्यार्थीहरुले विदाई भएर जाने विद्यार्थीहरुलाई मायाको चिनो र खादा लगाएर उज्वल भविष्यको कामना गर्दै विदाई गरेका थिए ।
कार्यक्रममा आउँदै गरेको फागुपूर्णिमालाई मध्यनजर गर्दै अतिथी र विद्यार्थीहरुबिच एक अर्कासँग रंग साटासाट गरेर फागुपूर्णिमालाई स्वागत गरिएको थियो । कार्यक्रमलाई रोचक र मनोरञ्जक बनाउन विद्यार्थीहरुले आफूभित्र भएको कलालाई व्यक्त समेत गरेका थिए ।
