सिन्धुली । गएरातीको वर्षाका कारण लेदो सहित विभिन्न ठाउँमा पहिरो खसेर अवरुद्ध भएको मध्यपहाडी राजमार्ग आठ घण्टापछि एकतर्फी सञ्चालनमा आएको छ ।
राजमार्गको खुर्कोट–घुर्मी सडक खण्ड अन्तर्गत गोलञ्जोर गाउँपालिका वडा नं. १ कुँडुले वडा नं. ३ को काली आँप र फिक्कल गाउँपालिका वडा नं. २ को सुम्नामबेशीमा गएको पहिरोका कारण सडक अवरुद्ध भएको थियो ।
फिक्कल गाउँपालिका, गोलञ्जोर गाउँपालिका, यान्त्रिक कार्यालय मुलकोट, प्रहरी लगाएतको प्रयासमा सडक अवरुद्ध हटाई बाटो सुचारु गरिएको जिल्ला प्रहरी कार्यालय सिन्धुलीका प्रमुख एसपी गोविन्दराज काफ्लेले बताए । राजमार्गको दुबैतर्फ सडक खुलाउन भने अझै केहि समय लाग्ने बताइएको छ ।
बुधबार बिहानदेखि राजमार्ग अवरुद्ध हुँदा पूर्वी पहाडी जिल्ला ओखलढुङ्गा, खोटाङ, सोलुखुम्बु, भोजपुर, उदयपुरबाट काठमाडौं आवतजावत गर्ने सवारी साधन बीच बाटोमै अलपत्र परेका थिए । एकतर्फी बाटो खुलाएर रोकिएका सवारी साधनलाई पठाईएको प्रहरीले जनाएको छ ।
