सिन्धुली । तेस्रो राष्ट्रिय माझी गोल्ड कप प्रतियोगिता जिल्लाको मरिणको बाह्रविसे खेल मैदान र हरिहरपुरगढी ५ बोटेनीमा जारी छ । शनिबार बोटेनी खेलमैदानमा सम्पन्न तीन खेलमा विजयी हुदै नेपाल माझी उत्थान संघ सिन्धुली, नेपाल माझी उत्थान संघ ओखलढुंगा र नेपाल माझी उत्थान संघ सुनसरी सेमिफाईनलमा प्रवेश गरेका छन ।
शनिवार भएका क्वाटर फाईनलका तीन खेलहरु नेपाल माझी संघ उत्थान मकवानपुर र नेपाल माझी उत्थान संघ ओखलढुङ्गा, नेपाल माझी उत्थान संघ धनकुटा र नेपाल माझी उत्थान संघ सुनसरी, नेपाल माझी उत्थान संघ सिन्धुली (आयोजक) र नेपाल माझी उत्थान संघ उदयपुरबीच सम्पन्न भएका थिए ।
नेपाल माझी उत्थान संघ सिन्धुलीका अध्यक्ष बबिन्द्रलाल माझीले दिएको जानकारी अनुसार बिहान भएको पहिलो खेलमा मकवानपुरलाई हराउँदै ओखलढुंगा सेमिफाइनलमा पुगेको हो । ओखलढुङ्गाले २ गोल र मकवानपुरले १ गोल गरेको छ ।
यस्तै दोस्रो खेलमा सुनसरीले धनकुटालाई पराजित गरि सेमिफाइनलको यात्रा सुरक्षित गरेको छ । सुनसरीले ५ गोल गर्दा धनकुटाले गोल गर्न सकेन । नेपाल माझी संघ सुनसरीका खेलाडी रितेश माझीले खेल अवधिभरमा ४ गोल हान्न सफल भए ।
शनिवारको तेस्रो खेलमा आयोजक नेपाल माझी संघ सिन्धुलीले सेमिफाइनलको यात्रा सुरक्षित गरेको छ । नेपाल माझी संघ उदयपुरलाई हराउँदै सिन्धुली सेमिफाइनलमा प्रवेश गरेको हो । सिन्धुलीले उदयपुरलाई १–० गोलमा विजय हासिल गरेको थियो ।
तीन खेलमा सिन्धुलीका राजकुमार माझी, ओखलढुङ्गाका निशान माझी र सुनसरीका रितेश माझी म्यान अफ द म्याच घोषित भए । कार्तिक १३ गतेदेखि सुरु भएको फुटबल २१ गते सम्पन्न हुने छ । खेलमा २३ टिमको सहभागिता रहेको आयोजक नेपाल माझी उत्थान संघ सिन्धुलीका अध्यक्ष बविन्द्रलाल माझीले बताए ।
