सिन्धुली । सिद्धवावा बचत तथा ऋण सहकारी संस्था लिमिटेड कनपा ६ को अध्यक्षमा राम बहादुर थापा निर्वाचित भएका छन । शनिबार सिन्धुलीमाढीमा सम्पन्न १६ औं वार्षिक साधारणसभा तथा छैटौं अधिवेशनबाट थापा अध्यक्षमा निर्वाचित भएका हुन ।
अधिवेशनबाट थापाको अध्यक्षमा ११ सदस्यीय नयाँ कार्यसमिति चयन गरिएको छ । जसको उपाध्यक्ष सरस्वती देवी देवकोटा, सचिव नवराज पहाडी, सहसचिव अमृता देवकोटा र कोषाध्यक्ष सन्तोष सापकोटा निर्वाचित भएका छन ।
यस्तै संस्थाको सदस्यमा रमिता मानन्धर, बिमला थापा खड्का, मान बहादुर मगर, प्रेम बहादुर खड्का, धनमाया अछामे मगर, दुर्गा थापा शर्मा निर्वाचित भएका छन ।
अधिवेशनबाट निवर्तमान अध्यक्ष गोकर्ण सुवेदी लेखा सुपरीवेक्षण समितिको संयोजक निर्वाचित भएका छन । उक्त समितिको सदस्यमा प्रमोद तिमल्सिना र डोरकुमारी थापा कुवँर निर्वाचित भएका छन ।
साधारणसभाको उद्घाटन संस्थाका अध्यक्ष गोकर्ण प्रसाद सुवेदीको अध्यक्षता एवम् जिल्ला सहकारी संघ सिन्धुलीका अध्यक्ष नवराज कोईरालाको प्रमुख आतिथ्यतामा सम्पन्न भएको थियो । उनले सहकारीले उत्कृष्ट व्यवस्थापनमा चलेको भन्दै अझै व्यवस्थित र कानुनलाई समेत ध्यान दिएर चल्ने विश्वास व्यक्त गरे ।
साधारणसभामा संस्थाले असल बचतकर्ता विष्णुमाया खड्का, असल कारोबारकर्ता गणेश बहादुर खड्का, अधिकतम बाल बचतकर्ता सञ्जु थापा, उत्कृष्ट बाल बचतकर्ता ओसिन शर्मा घिमिरे र अधिकतम सदस्यता वृद्धिकर्ताका रुपमा संस्थाका अध्यक्ष गोकर्ण प्रसाद सुवेदीलाई सम्मान गरेको छ । उनीहरुलाई दोसल्ला ओढाई प्रमाणपत्र प्रदान गरि सम्मान गरिएको थियो ।
साधारणसभा तथा अधिवेशनका अवसरमा संस्थाले नेपाल रेडक्रस सोसाईटीले सञ्चालन गरेको निःशुल्क रक्तदानका लागि एक करोड अभियानमा ५ हजार १२५ रुपैंया सहयोग हस्तान्तरण समेत गरेको छ । उक्त रकमको चेक संस्थाका अध्यक्ष गोकर्णप्रसाद सुवेदीले रेडक्रस सिन्धुलीका सभापति अशोक श्रेष्ठलाई हस्तान्तरण गरे ।
कार्यक्रममा संस्थाको गत आवको असार मसान्तसम्मको १८ लाख ७० हजार १ सय शेयरपूँजी रहेको, कुल बचत १ करोड ३३ लाख ८९ हजार ९४१ रहेको र ऋण लगानी १ करोड, ५३ लाख ३ हजार ६५४ रुपैंया रहेको उल्लेख गरिएको छ ।
साधारणसभामा राष्ट्रिय सहकारी बैंकका मेनेजर मिनिता पौडेल, नेफस्कुनका सेवा केन्द्र प्रमुख श्याम बुढाथोकी, सिन्धुली बचत तथा ऋण सहकारी संघका पुरुषोत्तम पहाडी, जिल्ला सहकारी संघका महासचिव एवम नेपाल रेडक्रस सोसाईटी सिन्धुलीका सभापति अशोक श्रेष्ठ लगाएतले शुभकामना मन्तव्य व्यक्त गरेका थिए । कार्यक्रममा संस्थाका उपाध्यक्ष सरस्वती देवकोटाले स्वागत गरेकी थिईन ।
बन्दशत्रमा संस्थाको प्रतिवेदन अध्यक्ष गोकर्ण प्रसाद सुवेदी, नीति तथा कार्यक्रम सचिव सारदा प्रसाद पहाडी र कोषाध्यक्षको प्रतिवेदन कोषाध्यक्ष कौशिला थापाले प्रस्तुत गरेका थिए । यस्तै लेखा सुपरिवेक्षण प्रतिवेदन लेखा सुपरिवेक्षण समितिका लेखा सुपरिवेक्षण समितिका संयोजक नवराज पहाडीले प्रस्तुत गरेका थिए ।
