सिन्धुली । अग्नी ग्रुपले सिन्धुली कोभिड अस्पताललाई १०० केभिएको जेनेरेटर अनुदान स्वरुप सहयोग गरेको छ । महिन्द्रा युनिलिटि भेइकल्स, ट्रयाक्टर तथा महिन्द्रा पाओरल डिजेल जेनेरेटरको अधिकारीक विक्रेता अग्नि ग्रुपले कोभिड अस्पतालमा लाइन जाँदा विरामीले अक्सिजन पाउन नसक्ने गरेको समाचार आएपछि अग्नीले उक्त जेनेरेटर सहयोग गरेको हो ।
प्रभात समाचार दैनिक र इसाझा नेपाल डटकममा सिन्धुलीको कोभिड अस्पताल नो लाईन नो अक्सिजन शिर्षकमा समाचार आएपछि सामाजिक रुपमा बहसको विषय बनेको थियो । अग्नी ग्रुप अन्तर्गत सिन्धुलीमा रहेको इन्कोर्पोरेटेड प्रालिको थ्रिएस सेटअप बिक्री शाखाका सेल्स इन्चार्ज उद्धव राउतले सिन्धुली अस्पताल व्यवस्थापन समितिका अध्यक्ष प्रलाद पोखरेललाई जेनेरेटर हस्तान्तरण गरेका हुन ।
जेनेरेटरको साँचो बुझ्दै अस्पताल व्यवस्थापन समितिका अध्यक्ष पोख्रेलले विद्युत नियमित नहुँदा कोभिड अस्पतालमा अक्सिजन सप्लाईमा परेको समस्या समाधान हुने विश्वास व्यक्त गरेका छन । उनले अब विरामीले लाईन जाँदा पनि सहज रुपमा अक्सिजन पाउने विश्वास व्यक्त गरेका छन । पोखरेलले अग्नी गू्पका प्रवन्ध निर्देशक क्याविनेट श्रेष्ठले तत्कालै जेनेरेटर उपलब्ध गराएकोमा धन्यावाद समेत दिएका छन ।
अग्नी ग्रुप अन्तर्गत सिन्धुलीमा रहेको इन्कोर्पोरेटेड प्रालिको थ्रिएस सेटअप बिक्री शाखाका सेल्स इन्चार्ज उद्धव राउतले विद्युत नियमित नहुँदा संक्रमितको उपचारमा समस्या भएको गुनासो आएपछि र विभिन्न सञ्चारमाध्यममा जेनेरेटरको अभावमा अक्सिजन प्लान्ट सञ्चालन र विरामीको उपचारमा समेत समस्या भएको समाचार आएपछि विद्युतको अभावमा विरामीले ज्यान गुमाउन नपरोस भनेर जेनेरेटर सहयोग गरेको बताए ।
जिल्लामा लाईन आउने जाने क्रम बढेसँगै कोभिडका विरामीलाई अक्सिजन सप्लाईमा समस्या भएको र प्लान नेपालले दिएको ३० केभिएको जेनेरेटरले धान्न नसकेपछि अस्पताल समस्यामा थियो । अब त्यो समस्या समाधान भएको छ । जेनेरेटरका लागि प्रदेशसभा सदस्य प्रदीप कटुवाल, अस्पताल विकास समितिका अध्यक्ष प्रलाद पोखरेल, समाजसेवी उज्वल विक्रम थापा लगाएतले पहल गरेका थिए । उक्त समाचारका कारण बाग्मति प्रदेश सामाजिक विकास मन्त्रालयले १२५ केभिएको जेनेरेटर खरिदका लागि निर्णय समेत गरेको थियो । सरकारी प्रक्रिया पुरा नहुदै अग्नी ग्रुपले १०० केभिएको जेनेरेटर हस्तान्तरण गरिसकेको छ ।
यो पनि पढ्नुहोस
