सिन्धुली । जिल्लामा थप एक जना पुरुषमा कोरोना संक्रमण पुष्टि भएको छ । प्रादेशिक प्रयोगशाला हेटौडामा सिन्धुलीबाट पठाईएको स्वाव परिक्षण गर्दा एक जनामा कोरोना पुष्टि भएको हो । साउदीबाट झण्डै २ हप्ता अघि दुधौली आई भलुवाईमा रहेको क्वारेन्टाईनमा बसेका दुधौली नगरपालिका २ का ३५ वर्षिय पुरुषमा कोरोना पुष्टि भएको हो ।
स्वास्थ्य कार्यालय सिन्धुलीका प्रमुख जितेन्द्र कुमार शाहका अनुसार दुधौली नगरपालिकाबाट पठाईएका ३७ नमुना र हरिहरपुरगढी गाउँपालिकाबाट पठाईएका ७ नमुना गरि ४४ नमुना परिक्षण गरिएकोमा १ जनाको रिपोर्ट पोजेटिभ आएको हो । अन्य ४३ जनाको रिपोर्ट नेगेटिभ आएको छ ।
संक्रमिति व्यक्तिको स्वास्थ्य अवस्था सामान्य रहेको दुधौली नगरपालिकाले जनाएको छ । उनलाई नगरपालिकाको पहलमा सिन्धुली अस्पतालको आइसोलेसनमा उपचारका लागि ल्याईएको छ । उनीसँगै सिन्धुलीबाट पठाईएका नमुनाबाट ८ जनामा संक्रमण पुष्टि भएको छ भने जिल्ला बाहिरबाट स्वाव संकलन भई जाँच गर्दा जिल्लाका अन्य ६ जनामा कोरोना पुष्टि भएको छ । यो सँगै जिल्लाका १४ जनामा कोरोना संक्रमण पुष्टि भएको सामाजिक विकास मन्त्रालयले जनाएको छ । जिल्लामा हालसम्म ६ सय ५ जनाको पिसिआर विधिबाट स्वास्थ्य परिक्षण गरिएको छ ।
संक्रमित मध्ये ५ जनाको सिन्धुली अस्पतालको आइसोलेसनमा उपचार भईरहेको छ । सिन्धुली अस्पतालको आइसोलेसनमा उपचार गराई निको भएर ३ जना डिस्चार्ज भई घर गई सकेका छन । संक्रमितको सम्पर्कमा आएका व्यक्तिहरुको खोजी गर्ने कार्य समेत सुरु भएको सामाजिक विकास मन्त्रालय, बाग्मति प्रदेशले विज्ञप्ति मार्फत जनाएको छ ।
